Covid19-ით გამოწვეული სტრესი და დაძაბულობა უკვე ერთ წელიწადზე მეტია, რაც ჩვენ ირგვლივაა. მეტად თუ ნაკლებად, ჩვენ ვცდილობთ, შევინარჩუნოთ განწყობა, ხალისი და არ დავკარგოთ ფერები. დღეს ადამიანების ერთერთ მთავარ ატრიბუტს პირბადე წარმოადგენს – მას უკვე ბევრი აწარმოებს. „მეიშუ“ ამზადებს პირბადეებს, რომლებსაც სხვებისგან სიფერადე და განწყობა გამოარჩევს. ამასთან, ის უსაფრთხოების ყველა მოთხოვნას აკმაყოფილებს.
დეტალებზე „თბილისი თაიმსს“ მარიამ გოლაშვილი,“მეიშუს“ თანადამფუძნებელი ესაუბრა.
რამდენი ხანია, რაც პირბადეების მზადება დაიწყეთ და მასალად რას იყენებთ?
პირბადეების დამზადება ზუსტად 1 წელია – 2020 წლის აპრილში დავიწყეთ. ვიყენებთ ორი სახის მასალას – აბრეშუმსა და ბამბას, რომლებიც ძალიან სუნთქვადი და ხარისხიანია. ასევე, ჩვენთვის ძალიან მნიშვნელოვანია, რომ პირბადეებს ჰქონდეთ ყურის რაც შეიძლება რბილი რეზინები, ვინაიდან ადამიანებს სამსახურისა თუ სხვა მიზეზების გამო ნიღბის მთელი დღის მანძილზე ტარებაც უწევთ.
საკმაოდ დიდი კონკურენციის პირობებში, რით არის განსხვავებული თქვენი პროდუქცია?
ვფიქრობ, რამდენიმე ფაქტორია, რაც „მეიშუს“ სხვებისაგან გამოარჩევს. ჩვენს კომპანიას საფუძველი 1 წლის წინ ჩაეყარა, როდესაც კოვიდისგან გამოწვეული ცვლილებები ყველასთვის და, მათ შორის, ჩვენთვისაც განსაკუთრებულად მძაფრი და დამთრგუნველი იყო. არაკომფორტულობის გარდა, ძალიან უარყოფით ემოციებს იწვევდა პირბადის მუდმივი ტარებაც. სწორედ მსგავსი მდგომარეობის ფონზე გაგვიჩნდა სურვილი, ჩვენი წვლილი შეგვეტანა და 2020 წლის მიერ მოტანილი არასასურველი ნივთი, ცოტათი უფრო მეტად სახალისო, კომფორტული და ესთეტიკური გაგვეხადა. „მეიშუს“ პირბადეები არის ხარისხიანი, დახვეწილი, მოსახერხებელი და, რაც მთავარია, ყველაზე ფერადი – მიუხედავად იმისა, რომ ქუჩაში ადამიანების სახეებისა და გამომეტყველების ყურება, მათზე დაკვირვება უკვე შეუძლებელი გახდა, ჩვენს ფერთა პალიტრაში თითოეულ ადამიანს აქვს საშუალება, იპოვოს ის ფერი, რომელიც ყველაზე უკეთ გადმოსცემს მათ ხასიათს, ან თუნდაც მხოლოდ იმ დღის განწყობასა და ემოციას.
უსაფრთხოების თვალსაზრისით, აკმაყოფილებს ისინი სამედიცინო სფეროს მოთხოვნებს?
დიახ, რა თქმა უნდა, პირბადის მთავარი ფუნქცია დაცულობაა და, შესაბამისად, უსაფრთხოება ჩვენთვის პრიორიტეტს წარმოადგენს. თითოეულ პირბადეს აქვს სამშრიანი ფილტრი, რომელიც უსაფრთხოების სტანდარტებს სრულად აკმაყოფილებს და გვაქვს შესაბამისი საბუთიც ლუგარის ლაბორატოორისაგან.
თქვენს პირბადეებს ულამაზესი დიზაინი გამოარჩევს – ბევრი მომხმარებელი გყავთ?
დიახ, ჩვენმა პირბადეებმა დასაწყისიდანვე მალევე მიიქცია მომხმარებლების ყურადღება და დღეს უკვე ძალიან ბევრ კმაყოფილ მომხმარებელს ითვლის, მათ რიგებში არიან როგორც ფიზიკური პირები, ასევე, სხვადასხვა ცნობილი ბრენდი და ორგანიზაციაც.
გარდა პირბადეებისა, რას ამზადებთ?
ამ ეტაპისთვის, პირბადეების გარდა გაყიდვაშია როგორც პირბადის ლამაზი და მოსახერხებელი საკიდები, ასევე, მარგალიტისა და ფერადი მასალებისგან დამზადებული სამკაულებიც. თუმცა, სულ მალე გეგმაში გვაქვს ორი ახალი პროდუქტის დამატებაც, რომელზეც უკვე გარკვეული პერიოდია, ვმუშაობთ. ჯერ არ დავასახელებ – რა არის, თუმცა, პირობას ვიძლევით, მთავარი მახასიათებლები იგივე დარჩება – დახვეწილი ვიზუალი, ხარისხი და ფერების მრავალფეროვანი არჩევანი.
მასალა მოამზადა : მარიამ ტიელიძემ
