საქართველო რომ ტურისტებისთვის ძალიან მიმზიდველი ქვეყანა, ამაზე ბევრს ვსაუბრობთ და ბევრი გვესმის. სხვადასხვა მიზეზის გამო, ჩვენს ქვეყანას ბევრი სტუმრობს. უცხოელები ცდილობენ, საქართველოში მოინახულონ ადგილები, რომლებიც სხვებისგან კიდევ უფრო გამორჩეულია. საინტერესოა, რომ აქ ბევრი ისეთი ადგილია, რომელიც ადგილობრივებისთვისაც კი აღმოჩენაა. თითოეულ რეგიონს აქვს საკუთარი მახასიათებლები და განსაკუთრებული ხიბლი.
სწორედ ამ ყველაფრის უკეთ წარმოჩენასა და ღირებულებების ხაზგასმას ემსახურება პროექტი, რომელიც რეგიონებში გასტროტურების ორგანიზებას გულისხმობს. არაერთი მიზეზისა და მიზნის გამო, ის ჩვენი ქვეყნის სხვადასხვა კუთხეს მოიცავს.
დეტალებზე „თბილისი თაიმსს“ გასტრონომიული ტურიზმის ბიზნეს ასოციაციის თავმჯდომარე, თამარ სიხარულიძე ესაუბრა.
რა მიზანზეა ორიენტირებული აღნიშნული პროექტი?
პროექტის მიზანია ქვეყნის რეგიონული სამზარეულოების გასტრონომიული მარშრუტების შექმნა და პოპულარიზება, არამატერიალური კულტურული ფასეულობების წარმოჩენა, შიდა ტურიზმის სტიმულირება, ეკონომიკისა და სოფლის მეურნეობის მდგრადი განვითარების ხელშეწყობა.
საქართველოს ტურიზმის ეროვნული ადმინისტრაცია, გასტრონომიული ტურიზმის ბიზნეს ასოციაციასა და გასტრონომიის ასოციაციასთან ერთად, გეგმავს რეგიონებში გასტრონომიული ტურების ორგანიზებას. პროექტის ამოცანაა, უკეთ წარმოაჩინოს რეგიონში არსებული გასტრონომიული და სხვა ტურისტული პროდუქტები, ხელი შეუწყოს ადგილობრივებს არსებული გასტრო პროდუქტების პოპულარიზაციასა და გაყიდვების ზრდაში. ასევე, ინფორმაცია მიიტანოს მეტ ქართველ მოგზაურამდე რეგიონებში არსებული ავთენტური გასტრონომიული და კულტურული რესურსის შესახებ.
დეტალურად, რა აქტივობებს ითვალისწინებს ის?
ტურის მომზადებისას წინასწარ ხდება რეგიონში ტურისტულად საინტერესო ყველა ობიექტის, ოჯახის, მეწარმის მოძიება და მონახულება. ტურის ორგანიზებამდე სამუშაო ჯგუფი მიემგზავრება რეგიონში მოძიებული ადგილების მოსანახულებლად, ტურისთვის შესარჩევად და მეპატრონეებთან სამომავლო ვიზიტის დეტალების განსახილველად. წინასწარ წყდება, თუ რომელი კერძი მზადდება შესაბამის ოჯახში/ობიექტზე, სად მოეწყობა გადასაღები კუთხე და ვინ მიიღებს კერძის მომზადების პროცესში მონაწილეობას. გარდა კერძების მომზადებისა, ტურში ასევე შეტანილი იქნება მარნები და რეგიონისთვის დამახასიათებელი აქტივობები.
ვინ მონაწილეობს ტურის ფარგლებში?
ტურის ფარგლებში მონაწილეობას მიიღებენ გამოცდილი შეფმზარეულები, რომლებიც მასპინძელს დაეხმარებიან კერძის მომზადებაში, გაეცნობიან ადგილობრივი რეცეპტებს და შემდგომ თავიანთი ხედვით გააფორმებენ კერძებს სტუმართან წარსადგენად.
რა შედეგზეა ორიენტირებული ეს ყველაფერი.
– მომზადდება სტატიები და ბლოგები მონაწილე ჟურნალისტების მიერ
– მომზადდება და ტელევიზიაში გაშუქდება ტურის შესახებ ინფორმაცია და სიუჟეტები
– შეიქმნება ობიექტებისა და მომზადებული კერძების ფოტომასალა
ამასთან, ტურის ყველა მონაწილე საკუთარ გვერდზე გააზიარებს ინფორმაციას ტურში შემავალი სასურველი ობიექტის შესახებ, მონაწილეები „დაჩექინდებიან“ სასურველ ობიექტებზე, ტურის მსვლელობისას ფოტოები განთავსდება ადმინისტრაციის. ასოციაციების სოციალურ გვერდზე, ყველა პოსტზე ვიყენებთ ჰეშთეგს #აღმოაჩინე ის, რაც შენია.
ასევე, მაისის მეორე ნახევარში ვგეგმავთ გასტრონომიულ ტურს კახეთის რეგიონში.
მასალა მოამზადა : მარიამ ტიელიძემ
