დღევანდელი სამყარო იძლევა იმის საშუალებას, რომ, სურვილისა და მონდომების შემთხვევაში, მეტი შევისწავლოთ ამა თუ იმ საქმიანობის შესახებ. სწორედ ასე ყალიბდებიან ადამიანები საკუთარი პროფესიის კარგ მცოდნეებად. ხათუნა ფაფელაშვილი თვითნასწავლია – ის ქმნის ეზოს დეკორაციებს, ამისთვის კი სხვადასხვა საინტერესო მასალას იყენებს.
ხათუნა “თბილისი თაიმსს” უამბობს, როგორ გადადგა პირველი ნაბიჯები მისთვის ზღაპრულ სამყაროში და საიდან ჩნდება იდეები, რის მიხედვითაც დეკორაციებს ქმნის.
“პროფესიით ვარ ფერმწერი. ამჟამად, ვარ ეზოს დეკორაციიებით გატაცებული. უფლის შეწევნით, ვქმნი ასეთ დეკორაციებს. იუთუბ-ზე ვუყურებდი სხვადასხვა ნაკეთობის დამზადებას სხვადასხვა ნივთისა და მასალისგან. დიდი მოწონება და სიყვარული დამეუფლა ცემენტით ნაკეთ დეკორაციებზე. ადრე სხვადასხვა მასალისგან ვქმნიდი დეკორაციებს ქაღალდით, ჭიქებით, ყავის მარცვლებით, ბისერებით. იუთუბ-ზე აღმოვაჩინე პოლიეთილენის ბოთლზე დეკორაციები. ავაწყვე სამი ზღაპრული სახლი. ამის მერე გამიტაცა ცემენტის ნაკეთობამ და დავიწყე მუშაობა”, – გვიყვება ხათუნა და ხაზს უსვამს, თუ რა მასალებისგან ქმნის ნამუშევრებს.
“ვიყენებ ცემენტს, ქვიშას, მავთულებს, ბუშტებს. დასამუშავებლად ვიყენებ ფუნჯს და მასტეხინს. ვაფერადებ და ვლაკავ. ვისაც აინტერესებს ხელოვნება და ეზოს დეკორაცია, ისინი იძენენ ჩემს ნამუშევრებს. ამ მხრივ, თვითნასწავლი ვარ. შემოქმედების დროს მომდის სხვადასხვა იდეა და ფანტაზია”, – ამბობს ხათუნა ფაფელაშვილი.
