დამწვრობის ცენტრის ხელმძღვანელის, გუგა ქაშიბაძე აცხადებს, რომ ლეღვის ნახარშის გამოყენება საქართველოს გარდა არსად შეხვედრია და ამ თემაზე კითხვებს უცხოელ კოლეგებთანაც ვერ სვამს. ამის შესახებ მან BMG-ს გადაცემაში ისაუბრა.
“ყოველ წელს, დამწვრობის ცენტრს იმედი გვაქვს ხოლმე, რომ ის წელი ჩავარდება და ნიძლავებიც კი იდება, თუმცა შემთხვევები, სამწუხაროდ, შარშანაც დაფიქსირდა. ეს არის სუფთა ქართული ფენომენი და ტრადიცია, არც არსად შემხვედრია და ვერც ვეკითხები ვერავის. ძალიან რთულია უცხოელ კოლეგებს აუხსნა, რატომ უნდა მოინდომოს ადამიანმა ემალის ქვაბში ლეღვის ფოთლების მოხარშვა, რომ თვისებები შეუნარჩუნოს კარგად და მერე კანზე წასმა”, — აცხასდებს ის.
გარდა ამისა, ქაშიბაძე საუბრობს მზით დამწვრობაზეც და აღნიშნავს, რომ ყოფილა მზეზე 7-8 საათის განმავლობაში წოლის შემდეგ დამწვრობის ცენტრში, მათ შორის რეანიმაციაში მოხვედრის შემთხვევებიც, რადგან დამწვრობას გადახურება დაემატა.
დამწვრობის ცენტრის ხელმძღვანელი მოქალაქეებს რეკომენდაციით მიმართავს, მზეზე არ გაჩერდნენ 11:00-დან 16:00 საათამდე პერიოდში, განსაკუთრებით კი მოარიდონ ბავშვები, გამოიყენონ მზისგან დამცავი საშუალებები და ასევე, ღია ფერის ქუდი.
მისი თქმით, დამწვრობის ცენტრში ადამიანების დახლოებით 80% დაუდევრობის, გაუფრთხილებლობისა თუ გარემოს შეუფასებლობის გამო ხვდება, 20% კი არის უბედური შემთხვევა
