ჩემი ენერგეტიკის მინისტრობის დროს რომ ყოფილიყო საუბარი ნამახვანჰესზე, უკვე აშენებული იქნებოდა, – ამის შესახებ თბილისის მერმა და ენერგეტიკის ყოფილმა მინისტრმა, კახა კალაძემ განაცხადა. საკითხზე კომენტირებისას კალაძემ ისიც თქვა, რომ მისი მინისტრობის დროს საქართველოში ყველაზე მეტი ჰესი აშენდა.
„ჩემი პოზიცია არის, რომ რაც შეიძლება ბევრი ჰესი უნდა აშენდეს ქვეყანაში, მაქსიმალურად რაციონალურად უნდა იქნას გამოყენებული რესურსები, რომელიც ქვეყანას გააჩნია იმისთვის, რომ ჩვენი ქვეყნის მოქალაქეები არ ვიყოთ დამოკიდებული რუსეთიდან, აზერბაიჯანიდან, სომხეთიდან და თურქეთიდან შემოტანილ ელექტროენერგიაზე.
გრძელვადიან პერსპექტივაში ეს პირდაპირ აისახება ჩვენს ჯიბეზე, რადგან გვიწევს მაღალი ტარიფების გადახდა. როცა მე ენერგეტიკის მინისტრი ვიყავი, მეამაყება, რომ ყველაზე მეტი ჰესი აშენდა, რაც ძალიან მაგარია ქვეყნისთვის“, – განაცხადა კალაძემ.
შეგახსენებთ, რომ რამდენიმე თვეა, ნამახვანჰესის წინააღმდეგ საპროტესტო აქციები მიმდინარეობს, რომელიც გუშინ დედაქალაქშიც შედგა. აქციის მონაწილეები პროექტის განმახორციელებელ კომპანია “ენკასთან” დადებული ხელშეკრულების შეწყვეტას ითხოვენ, მიუხედავად იმისა, რომ კომპანიამ მთავრობის ჩართულობით კაშხლის მშენებლობა შეაჩერა და მზადაა, ყველა კვლევას გადახედოს. საპროტესტო აქცია დღესაც არის დაგეგმილი.
