ჩვეულებრივ, ადამიანებს ხელსაქმისადმი ინტერესი და მისი სიყვარული ბავშვობიდან მოჰყვებათ ხოლმე. უმეტესად, ბებიის მიერ ნასწავლი დეტალები განსაკუთრებულ ემოციებთან, მინდომებასთანაა დაკავშირებული. ნათია მჭედლიშვილისთვისაც ქსოვის პროცესის მიმართ ინტერესი სათავეს ბავშვობაში იღებს. უფრო დეტალურად, ის „თბილისი თაიმსს“ ესაუბრა.
„პირველი კლასიდან მოყოლებული ვქსოვ. რაც თავი მახსოვს, ამ ხელსაქმით ვარ დაკავებული, მაგრამ რაც ეს ყველაფერი ჩემთვის შემოსავლის წყაროც არის, გახლავთ, დაახლოებით, 12-13 წელი. ეს ყველაფერი ჩემი მეგობრის წყალობით დაიწყო – თავდაპირველად, მან მომაქსოვინა ქუდი და ასე დავიწყე. ამის შემდეგ, ვთანამშრომლობდი ონლაინმაღაზიებთან, გამიჩნდნენ საკუთარი მომხმარებლები. შარშან “ინსტაგრამის” მეშვეობით ვმუშაობდი, მაგრამ შეიქმნა რაღაც პრობლემა და დღეს “ფეისბუქ” გვერდით ვმუშაობ“.
ნათია „ხელნაქსოვის“ უახლოეს გეგმებზეც საუბრობს. ასევე, განმარტავს, რომ ქსოვის პროცესი შრომატევადია, შედეგი კი – ლამაზი ნამუშევარი.
„მაქვს დიდი გეგმები – ქართული შალით და ხევსურული და თუშური ორნამენტებით ვაპირებ ჟაკეტების გაკეთებას, მაგრამ ახლა ბევრი შეკვეთა მაქვს და, ჯერჯერობით, ეს გეგმა ვერ მივიყვანე სრულყოფილებამდე. ეს დიზაინი, ვგულისხმობ – ყვავილებით გაფორმებას, ჩემი მოფიქრებულია. პროცესი შრომატევადია, მაგრამ საბოლოოდ ნამუშევარი ძალიან ლამაზი გამოდის“.
როგორც ნათია ამბობს, მას არაერთი შემოთავაზება ჰქონდა სხვადასხვა ბრენდისგან, თუმცა, მათ მიერ შეთავაზებული თანხა გაწეული შრომის შესაბამისი არ აღმოჩნდა.
„სიმართლე გითხრათ, მე ქსოვის პროცესით უფრო მეტ სიამოვნებას ვიღებ, ვიდრე, მაგალითად, თანხის მიღებაა. მქონდა გარკვეული შემოთავაზებები სერიოზული ბრენდებისგან, მაგრამ იმდენად ცოტას იხდიან, რომ ნამდვილად არ მიღირს ამხელა შრომის ფასად. აბსოლუტურად ყველაფრის მოქსოვა შემიძლია, მაგრამ ძალიან დამამცირებელია ის თანხა, რასაც ისინი იხდიან“.
