საზოგადოებისთვის ცნობილი გახდა, რომ მოპედის მძღოლებს მართვის მოწმობა დასჭირდებათ. შესაბამისად, მათ თეორიული ნაწილი ექნებათ ჩასაბარებელი.
დეტალებზე “თბილისი თაიმსს” ტრანსპორტის საკითხების ექსპერტი, მევლუდ მელაძე ესაუბრა.
“დაახლოებით, 7 წლის წინ, როდესაც მოპედების შემოდინების პირველი ნაკადები დაიწყო, მაშინვე დავაფიქსირე პოზიცია, რომ დაწყებულიყო მოპედების აღრიცხვიანობა. ის მოიხსენიებოდა, როგორც ველოსიპედი. მე მაშინვე ვთქვი, რომ თუ რეგისტრაცია არ ექნებოდა, როცა მოპედები მომრავლდებოდა, ისინი ვერ ივლიდნენ ქუჩაში, როგორც ველოსიპედები – ის არის სატრანსპორტო საშუალება, რომელიც იყენებს საგზაო ნაწილს და მოძრაობს ავტომობილებთან ერთად.
მაშინ ეს თემა არ იყო აქტუალური. მერე უკვე, სკუტერებისა და მოპედების დიდმა ნაკადმა და იმან, რომ ქუჩაში ისინი ქაოტურად მოძრაობდნენ და ბევრი საგზაო შემთხვევის მაპროვოცირებლები იყვნენ, ეს თემა განაახლა”, – განაცხადა მელაძემ.
მისი თქმით, ზოგ ქვეყანაში მოპედებისთვის სავალდებულოა მართვის მოწმობა, ზოგან – არა.
“არის ქვეყნები, სადაც მართვის მოწმობა მოეთხოვებათ და არის ქვეყნები, სადაც არ მოეთხოვებათ. ჩვენ ევროპა ამას გვავალდებულებს. მართვის მოწმობა არ მოეთხოვება 50 კუბურ სანტიმეტრამდე. მაგრამ სანომრე ნიშანი აბსოლუტურად ყველას აქვს, რათა შეიძლებოდეს გამიჯვნა.
მოპედების მართვისთვის საჭირო იქნება M კატეგორიის მართვის მოწმობა.
იმის გამო, რომ დღეს მოპედსა და სკუტერს არ სჭირდება მართვის მოწმობა, ბევრი ბავშვი ატარებს მათ. ეს საფრთხისშემცველია, რადგან მათ არანაირი პასუხისმგებლობა არ აქვთ. 13 წლის ბავშვს რომ საგზაო შემთხვევა მოუვიდეს, იქაც კი ვერ აღიარებენ დამნაშავედ. საჭირო გახდა ამ პუნქტის დამატება – მართვის მოწმობა ჰქონდეს 14 წლიდან ბავშვებს. აქაც იყო დისკუსიები. ეს ასაკი გადაწყდა 16 წელზე, რადგან უფრო პასუხისმგებლობიანია ადამიანი”, – განაცხადა მევლუდ მელაძემ “თბილისი თაიმსთან” საუბრისას.
მასალა მოამზადა : მარიამ ტიელიძემ
