დღეს „ფსიქიკური ჯანმრთელობისა და ნარკომანიის პრევენციის ცენტრში“ გაიმართება ფორუმი: „რელიგიები ნარკომანიის წინააღმდეგ“, რომელზეც განიხილება ნარკომანიის წინააღმდეგ ბრძოლაში სახელმწიფოს, პროფესიული საზოგადოებისა და რელიგიური გაერთიანებების თანამშრომლობის როლი. ორგანიზატორების ინფორმაციით, ფორუმში მონაწილეობას მიიღებენ ინტერრელიგიური საბჭოს წევრები, „ფსიქიკური ჯანმრთელობისა და ნარკომანიის პრევენციის ცენტრის“ ხელმძღვანელობა, დარგის წამყვანი სპეციალისტები, ხელისუფლების/სამინისტროების წარმომადგენლები. ინტერრელიგიურ საბჭო მოიცავს ქვეყანაში მოქმედ 11 რელიგიურ გაერთიანებას. საბჭო 2011 წლიდან ფუნქციონირებს. მისი კოორდინატორია არასამთავრობო ორგანიზაცია „ 21-ე საუკუნე“. საბჭოში 10 რელიგიური კონფესია და საქართველოს მართლმადიდებელი ეკლესია მუშაობს 3 მიმართულებით:
- რელიგიური გაერთიანებების აქტიური თანამშრომლობა ქვეყნისათვის მნიშვნელოვანი პრობლემების დაძლევის საქმეში (ნარკომანია, ოჯახური ძალადობა, მშვიდობის პროპაგანდა და სხვა.)
- რელიგიურ გაერთიანებებს შორის ურთიერთობის აქტუალურის საკითხების გადაწყვეტა;
- სახელმწიფო სტრუქტურებსა და რელიგიურ გაერთიანებებს შორის თანამშრომლობის ხელშეწყობა.
„ფორუმის მიზანია, ნარკომანიის წინააღმდეგ ბრძოლაში სახელმწიფოს, დარგის სპეციალისტებისა და რელიგიური გაერთიანებების თანამშრომლობის ხელშეწყობა. პრობლემის დაძლევის საქმეში რელიგიური გაერთიანებების ჩართულობის გააქტიურება. დღევანდელ დღეს, მსოფლიოში განვითარებული მოვლენების ფონზე, განსაკუთრებულ მნიშვნელობას იძენს რელიგიურ გაერთიანებათა რესურსების მიმართვა ქვეყნისათვის აქტუალურ პრობლემებზე მუშაობის საქმეში,“ – აცხადებს ღონისძიების ორგანიზატორი ფსიქოლოგიის დორქტორი, პროფესორი თეა გოგოტიშვილი. 22.01.15