ძალიან ცოტა დრო გავიდა მას შემდეგ, რაც წიგნების მაღაზია “ბიბლუსში” მკითხველს გაუჩნდა შესაძლებლობა, შეიძინოს წიგნი, სახელად “ლ”. წიგნი განსხვავებული სათაურით, რომელიც ერთი გოგონას ისტორიას გვიყვება. ამასთან, ის საინტერესო საკითხავია იმდენად, რამდენადაც თანამედროვეობის გამოწვევებს ეხება. დეტალებზე “თბილისი თაიმსს” თავად ავტორი, ნინო მანი ესაუბრა.
“თავდაპირველად, დავიწყე სხვა წიგნზე მუშაობა. შემდეგ უკვე, ერთ დღეს მივხვდი, რომ სხვა პრობლემები უფრო მეტად მაწუხებდა. წიგნში ასახული პრობლემები პირადად შემეხო, ისევე როგორც ჩვენს ქვეყანაში მცხოვრებ ადამიანთა უმრავლესობას. აქედან გამომდინარე, მივხვდი, რომ ეს საკითხები ძალიან მაღელვებდა და მინდოდა, რომ ამ კონკრეტული საკითხების მიმართ ჩემი გულისტკივილი კიდევ უფრო სხვაგვარად გამომეხატა. გადავწყვიტე, ჩემი სათქმელი ამ კონკრეტული წიგნის საშუალებით მეთქვა. ის წიგნი, რაზეც მე თავდაპირბელად დავიწყე მუშაობა, შევაჩერე და ამ წიგნზე გადმოვერთე”.
როგორც ავტორი აღნიშნავს, ოთხი წელი გავიდა მას შემდეგ, რაც მან ამ წიგნის სიუჟეტზე დაიწყო მუშაობა.
“ეს იყო, დაახლოებით, ოთხი წლის წინ. თუმცა, ჩემი დატვირთული გრაფიკიდან გამომდინარე, ხშირად ვერ ვახერხებდი მასზე მუშაობას. მქონდა, მაგალითად, წელიწად-ნახევრიანი შესვენება წიგნზე მუშაობის, ამ ოთხი წლის განმავლობაში.
რეალურად, ამ წიგნის დაწერა უფრო მოკლე დროშიც შეიძლებოდა, თუ მისთვის უფრო მეტ დროს გამოვყოფდი. მაგრამ, როგორც ვთქვი, სხვადასხვა მიმართულებით აქტიურობის გამო, ბევრად მეტი დრო დამჭირდა,
მას შემდეგ, რაც მსოფლიო და, მათ შორის, ჩვენი ქვეყანა დადგა პანდემიის წინაშე და დისტანციური მუშაობის რეჟიმზე გადავედი სამსახურში, დამეზოგა უფრო მეტი დრო. გადავწყვიტე, ამ ვითარებაში რაღაც სასარგებლო მენახა. ვიმუშავე წიგნზე. ასე დაიბადა “ლ”.
ნინო მანი წიგნის სათაურის შესახებაც გვესაუბრა და აღნიშნა, რომ უმთავრესი ინტერესი სწორედ ის არის, რატომ “ლ”
“სწორედ ეს არის მთელი ინტერესი. მე პირადად არ მიყვარს, როდესაც ვიცი წიგნის თუ ფილმის ფინალი, ამიტომ, ინტერესი რომ იყოს შენარჩუნებული, ყველას ვურჩევ, წაიკითხოს და გაიგოს, რატომ “ლ”. ეს არის მთელი წიგნის არსი”.
მასალა მოამზადა : მარიამ ტიელიძემ
