“სანამ 2-ციფრიანი ეკონომიკური ზრდა მოსახლეობის კეთილდღეობაზე არ აისახება, დახმარებაზე უარის თქმის ლოგიკა გაუგებარია”, – ამის შესახებ საქართველოს პრეზიდენტმა სალომე ზურაბიშვილმა ადმინისტრაციაში გამართულ საგანგებო ბრიფინგზე განაცხადა.
„განცხადებული უარი ევროკავშირის სესხის მიღებაზე მოსახლეობის დიდი ნაწილისთვის და პირადად ჩემთვის, საკმაოდ გაუგებარი ნაბიჯია. ეკონომიკური არგუმენტი ვალის შემცირების აუცილებლობის შესახებ ანალიზს ვერ უძლებს. რაც არ უნდა იყოს ჩვენი ეკონომიკის ზრდა, თუნდაც 2 -ციფრიანი, ის მაინც არ ანულირებს იმ სოციალურ და ეკონომიკურ ზიანს, რაც კორონავირუსმა მოუიტანა ჩვენს მოსახლეობას და რის შემცირებასაც ემსახურებოდა აღნიშნული 75 მლნ ევროიანი ოდენობის სესხი. გაუგებარია, რა განაპირობებს, რომ დღეს საკუთარი მოქალაქეების კრიზისულ მდგომარეობაზე მეტად, საერთაშორისო ვალის შემცირება გახდა პრიორიტეტული. სანამ 2-ციფრიანი ზრდა მოსახლეობის კეთილდღეობაზე არ აისახება, დახმარებაზე უარის თქმის ლოგიკა გაუგებარია“, – განაცხადა სალომე ზურაბიშვილმა.
პრეზიდენტის თქმით, პარადოქსულად ჟღერს, როცა ევროპულ დახმარებაზე ამბობ უარს და მეორე მხრივ, რიკოთის გზაზე აპელირებს მთავრობა იმ ფონზე, როცა ეს გზა დიდწილად სწორედ ევროპიდან წამოსული სესხებით ხორციელდება.
„ამ ნაბიჯის ეკონომიკური შედეგები მხოლოდ სესხის აღებით არ გამოიხატება. აქ მთავარი ჩვენი ქვეყნის რეპუტაცია და სიტყვის სანდოობაა“, – აღნიშნა პრეზიდენტმა.
სალომე ზურაბიშვილის თქმით, ის იდგება ქვეყნის ევროპული არჩევანის მხარეს და ამ არჩევანის შეცვლის საშუალებას არავის მისცემს.
შეგახსენებთ, საქართველოს მთავრობა უარს აცხადებს, ევროკავშირის 150 მლნ-ევროიანი მაკროფინანსური დახმარების მეორე ნაწილზე – 75 მლნ ევროს მიღებაზე. მართალია, „ოცნების“ ხელისუფლების წევრები ირწმუნებიან, რომ უარის მიზეზი მაღალი ეკონომიკური ზრდის შედეგად ბიუჯეტში მობილიზებული მილიარდი ლარია და ასევე მიზანი, შეამცირონ ქვეყნის საგარეო ვალი, მაგრამ ფაქტია, EU-ს მაკროეკონომიკური ტრანში 2021 წლის 30 სექტემბრამდე იმ შემთხვევაში გადმოირიცხებოდა, თუ საქართველო შეასრულებდა ორმხრივად შეთანხმებულ ვალდებულებებს, რომელიც 2020 წლის სექტემბერში ევროკავშირთან შეთანხმებით აიღო. მათ შორის იყო სასამართლო სისტემის რეფორმირება. „პატივს ვცემთ რა საქართველოს მთავრობის გადაწყვეტილებას, ამავე დროს აღვნიშნავთ, რომ საქართველომ ვერ შეძლო საკმარისად შეესრულებინა მაკროფინანსური დახმარების მიღების პირობა და კერძოდ, გაეზარდა სასამართლო სისტემის მდგრადობა, ანგარიშვალდებულება და ხარისხი“, – განაცხადეს ევროკავშირის წარმომადგენლობაში საქართველოს მთავრობის პასუხად.
