კოვიდ პანდემიამ დასაქმების სფეროში ძალიან დიდი პრობლემები შექმნა. ასეა მსოფლიოში და ასეა საქართველოში. ბოლო დროს ხშირად გვესმის, რომ საქართველოში ეკონომიკურ-სოციალური რეალობა გაჯანსაღდა. ამ მოცემულობაში, რა ვითარებაა დასაქმების ადგილების მხრივ – საკითხის შესახებ „თბილისი თაიმსს“ ეკონომიკის ექსპერტი, იოსებ არჩვაძე ესაუბრა.
„ცალსახდ, დასაქმების მხრივ მდგომარეობა გაუმჯობესებულია, რამდენად ოპტიმალურია, ამაზე ჯერ საუბარი ნაადრევია, რადგან ჩვენ საკმაოდ მაღალი გვაქვს ქვეყანაში უმუშევრობის დონე. ქვეყნის ფარგლებს გარეთაა გასული ათასობით ადამიანი, ძირითადად, იმის გამო, რომ საქართველოში საკუთარი კვალიფიკაციის შესაბამისი სამსახური ვერ ნახეს და იძულებულები არიან, უნარების რეალიზება სხვა ქვეყანაში მოახდინონ. თუმცა ის, რაც ბოლო კვარტლებში ხდება, მაინც პოზიტიურ ნიშანს ატარებს.
თუ ავიღებთ მხოლოდ მეორე კვარტალს, პირველ კვარტალთან შედარებით, დაახლოებით 112 000-ით გაიზარდა ეკონომიკურად აქტიური მოსახლრობის რაოდენობა. ეს ხდება კოვიდ რეალობაში, როდესაც, ფაქტობრივად, მოსახლეობის რიცხვი არ გაზრდილა, მაგრამ გაიზარდა ეკონომიკურად აქტიური ადამიანების რიცხვი. რაც მთავარია, დასაქმებულთა რაოდენობა მეორე კვარტალში პირველ კვარტალთან შედარებით გაიზარდა 85 000-ით. ანუ, სულ ცოტა, 85 000 სამუშაო ადგილი შეიქმნა. თითოეული სამუშაო ადგილის უკან დგანან კონკრეტული ადამიანები, შესაძლებლობები, შემოსავლები…“, – აცხადებს არჩვაძე.
ექსპერტი ბიზნეს სექტორში დასაქმების ბოლოდროინდელ მაჩვენებეკს ეხმაურება.
„ახლახან გამოქვეყნდა ბიზნეს სექტორში დასაქმების მაჩვენებელი და იქ საშუალო ხელფასმა 1 3000 ლარს გადააჭარბა. ეს 85 000 სამუშაო ადგილი კერძო სექტორში შეიქმნა და არა – საჯაროში. 1 000 ლარიც რომ ავიღოთ საშუალო ხელფასი, ეს ნიშნავს, რომ, სადღაც, 85-დან 90 მლნ ლარამდე დამატებითი შემოსავალი გაჩნდა თვეში.
თუმცა, ვიმეორებ, რომ ჯერ კიდევ არ არის დამაკმაყოფილებელ დონეზე დასაქმების მაჩვენებელი. დიდია უმუშევრობის დონე. ყოველი 100 შინამეურნეობიდან ხელფასის მიმღებთა რაოდენობა არის მხოლოდ 81 და ეს არ არის საკმარისი“, – განაცხადა იოსებ არჩვაძემ „თბილისი თაიმსთან“ საუბრისას.
მასალა მოამზადა : მარიამ ტიელიძემ
