ყველასთვის კარგად ცნობილია, რომ რამდენიმე დღის წინ პარტია „საქართველოსთვის“ დამფუძნებელმა და თავჯდომარემ გიორგი გახარიამ საკუთარი კანდიდატურა დააყენა თბილისის მერად 2 ოქტომბრის თვითმმართველობის არჩევნებში.
მოგეხსენებათ ისიც, რომ თბილისის მერობისთვის იბრძვიან ენმ-სა და გაერთიანებული ოპოზიციის კანდიდატი ნიკანორ მელია, ხოლო „ქართული ოცნებიდან“ კახა კალაძე. ვიდრე გიორგი გახარია საკუთარ კანდიდატს დააყენებდა, ალბათ ყველასთვის ცხადი იყო, რომ მთავარი ბრძოლა სწორედ ზემოთ დასახელებულ ორ კანდიდატს შორის გაიმართებოდა და ხმათა უმრავლესობაც სწორედ მათ გარშემო განაწილდებოდა, მიუხედავად სხვა პარტიების მხრიდან დაყენებული კანდიდატებისა.
გიორგი გახარიამ საკუთარი კანდიდატის წამოყენებით ერთგვარად შეცვალა თბილისის მასშტაბით არსებული სურათი. გიორგი გახარია განსაკუთრებულად მაღალი რეიტინგით სარგებლობდა, როდესაც იგი პრემიერ-მინისტრი იყო, ასევე მნიშვნელოვანია ის ფაქტიც, რომ „ქართული ოცნებიდან“ წამოსვლის შემდეგ მისი პიროვნული რეიტინგი არცთუისე შემცირებულია, მაგალითისთვის ივნისის თვის Edison Research-ის კვლევით, გიორგი გახარიას, როგორც პოლიტიკოსს დადებითად 60%ზე მეტი ასახელებს, ეს დასტურდება IRI-ის სხვადასხვა კვლევითაც, მაშასადამე უნდა ვივარაუდოთ, რომ გიორგი გახარია კალაძისთვისა და ნიკა მელიასთვის საკმაოდ კონკურენტუნარიანი კანდიდატი იქნება და თბილისელების ხმების მაქსიმალურად მობილიზებაში ახლა ორი ძირითადი კანდიდატის ნაცვლად, უკვე სამი იბრძოლებს.
გიორგი გახარია, ისევე, როგორც კახა კალაძე და ნიკანორ მელია დარწმუნებულია საკუთარ გამარჯვებაში. კახა კალაძემ რამდენიმე დღის წინ განაცხადა, რომ არჩევნებს პირველივე ტურში დაასრულებს, თითქმის იგივე პოზიციაზეა ნიკანორ მელია, რომელიც აცხადებს, რომ მისი გამარჯვება გარდაუვალია.
მნიშვნელოვანია ის ფაქტიც, თუ როგორ აფასებდნენ გიორგი გახარიას ამ გადაწყვეტილებას „ქართული ოცნების“ ლიდერები. მამუკა მდინარაძემ რამდენიმე დღის წინ განაცხადა: „მელიასთვის გადადგა და ახლა მელიას მეორე ტურში გასათრევად იწყებს ბრძოლას, კითხვის ნიშნები კიდევ არსებობს?“.
რა თქმა უნდა, გიორგი გახარია გავრცელებულ ბრალდებებს კატეგორიულად უარყოფს. მან ერთ-ერთ სატელევიზიო ეთერში განაცხადა, რომ მას სურს კახა კალაძის მეორეზე, ხოლო ნიკა მელიას მესამე ადგილზე გადაწევა. მიუხედავად ამისა, ოპოზიციისა და ექსპერტების დიდი ნაწილი დარწმუნებულია, რომ ძირითადი ბრძოლა მაინც კახა კალაძესა და ნიკა მელიას შორის გაჩაღდება.
რაც შეეხება მეორე ტურს, არსებული კანდიდატურებიდან გამომდინარე, მეორე ტური სავარაუდოდ გარდაუვალია. ეს კარგად ესმის მმართველს გუნდსაც, ვინაიდან, მას შემდეგ, რაც გიორგი გახარიამ მოულოდნელად საკუთარი კანდიდატურა დააყენა, ქართული ოცნების რიტორიკა ცალსახად შეიცვალა და მეორე ტურზე საუბარიც გამოიკვეთა:
„ეს არის ნიკანორ მელიასთვის გადამდგარი ყოფილი პრემიერი, რომელიც ახლა დააყენეს მერობის კანდიდატად, რომ რამენაირად მელია გაათრიონ (უხეშ ტერმინს გამოვიყენებ) მეორე ტურში“ – ირაკლი კობახიძე, „ქართული ოცნების“ თავმჯდომარე.
მასალა მოამზადა: თორნიკე ყრუაშვილმა
