ნორმალურ ცხოვრებას ერთი წლის განმავლობაში დავუბრუნდებით, – განაცხადა ფარმაცევტული კომპანია Pfizer-ის აღმასრულებელმა დირექტორმა, ალბერტ ბურლამ.
„ვფიქრობ, რომ ერთი წლის განმავლობაში ჩვეული ცხოვრებისკენ დაბრუნებას შევძლებთ. მაგრამ ეს არ ნიშნავს, რომ ახალი ვარიანტები აღარ გამოჩნდება და რომ ჩვენ ვაქცინაციის გარეშე ცხოვრებას შევძლებთ“, – აღნიშნა Pfizer-ის აღმასრულებელმა დირექტორმა.
ალბერტ ბურლას თქმით, იმის გათვალისწინებით, რომ ვირუსი მთელ მსოფლიოში ვრცელდება და ახალი ვარიანტები ჩნდება, ყველაზე სავარაუდო სცენარის ფარგლებში, ყოველწლიური ვაქცინაცია გახდება საჭირო.
„ასევე გვექნება ვაქცინები, რომელიც, სულ მცირე, ერთი წლის განმავლობაში იმოქმედებს და ვფიქრობ, რომ ყოველწლიური ვაქცინაცია ყველაზე სავარაუდო სცენარია, მაგრამ ეს დანამდვილებით არ ვიცით. უნდა დაველოდოთ და ვნახოთ მონაცემები“, – აღნიშნა ალბერტ ბურლამ.
23 სექტემბერს, კომპანია Moderna-ს აღმასრულებელმა დირექტორმა, სტეფან ბანსელმა განაცხადა, რომ კორონავირუსის პანდემია ერთ წელიწადში შეიძლება დასრულდეს.
„თუ ბოლო ექვსი თვის განმავლობაში ინდუსტრიის მასშტაბით წარმოების შესაძლებლობების გაფართოებას გადავხედავთ, საკმარისი დოზები უნდა იყოს ხელმისაწვდომი მომავალი წლის შუა პირველი ნახევრისთვის, რათა ყველას შეეძლოს აცრა. საჭიროებისამებრ, გამაძლიერებელი დოზები ასევე უნდა იყოს შესაძლებელი“, – აღნიშნა კომპანია Moderna-ს აღმასრულებელმა დირექტორმა შვეიცარიულ გაზეთ Neue Zuercher Zeitung-თან ინტერვიუში.
