როგორც კი მის ნამუშევრებს ნახავთ, აუცილებლად შეგიპყრობთ განცდა, რომ მათში მთელი გული და სულია ჩადებული. ეს განცდა რეალურია, ბიზნესს კი ჰქვია – „და’წნული“. რამაზ რევაზიშვილი კასპის რაიონის სოფელ ქვემო გომიდანაა. 18 წელია, რაც ის დაწნულ კალათებს ქმნის. ადრე მისი მამაც აკეთებდა მსგავს ნამუშევრებს, თუმცა, არა ასე მასობრივად, არამედ – სახლისთვის. კალათებს რამაზის პაპაც ამზადებდა.
რაც შეეხება მასალას – როგორც რესპონდენტი აღნიშნავს, იმ მასალას, რასაც იყენებს, კახეთში წნორის ტოტებს ეძახიან, თვითონ ის წნელს უწოდებს.
საინტერესოა ერთი რაღაც – გარდა იმისა, რომ ამ ნამუშევრების შეძენა მთელი საქართველოს მასშტაბით არის შესაძლებელი, ასევე, ის ხელმისაწვდომია უცხოელებისთვისაც. მაგალითად, რამაზი იხსენებს, რომ ერთხელ, როდესაც ინდოელები ფილმს იღებდნენ, სწორედ მისი კალათები შეიძინეს. გარდა ამისა, ახლობელმა დაამზადებინა და საფრანგეთში გააგზავნა შეკვეთა. ასევე, ჩამოსულები იყვნენ რუსეთიდანაც.
„თბილისი თაიმსთან“ საუბრისას რამაზი აღნიშნავს, რომ ახლაც ძალიან ბევრი შეკვეთა აქვს.
‘’მე ამ წნელების სპეციალური ჯიშები შემოვიტანე და ვამრავლებ. ბევრი რომ შემომეტანა, ძალიან ძვირი დაჯდებოდა. უკვე მეოთხე წელია და ახლა შევავსებ ნაკვეთს. ჩვენი მასალა გვექნება, სარბენი არ იქნება და, რაც მთავარია, ეს მასალა არის ხარისხიანი დანამუშევრები გამოვა ლამაზი“, – ამბობს რამაზ რევაზიშვილი ჩვენთან საუბრისას.
მასალა მოამზადა : მარიამ ტიელიძემ
