მარიამ მანჯგალაძე – ასე უნდა მოძებნოთ ხელოვანი, რომელიც თქვენს, ახალი წლის დღეებს ჯადოსნურს გახდის. ფერადი, გემოვნებიანი, ხალისიანი ნამუშევრები, უბრალოდ, მაგიურ გარემოს შეგიქმნით.
„ძალიან მომწონს, სახელითა და გვარით რომ მკვიდრდებიან“ – ასე პასუხობს მარიამი შეკითხვას, რატომ არ აქვს მის ბრენდს რაიმე კონკრეტული სახელწოდება.
ის „თბილისი თაიმსს“ თავად ესაუბრა.
„ბავშვობიდან ვიყავი დაინტერესებული მსგავსი ნამუშევრების შექმნით. მამა მყავს მხატვარი, მეც სამხატვრო აკადემია დავამთავრე და მცირე ასაკიდან მუდმივად რაღაცებს ვამზადებდი. თუმცა, უკვე ბოლო რვა წელია, რაც საკუთარი გვერდი მაქვს და ბოლომდე გადავერთე ამ მიმართულებით.
შეიძლება ითქვას, ნამუშევრების შესაქმნელად ყველაფერს ვიყენებ, რაც კი შესაძლებელია, იქნება ეს მეტალი, ხე და ა.შ. ზოგჯერ ასეც ხდება, რომ მომხმარებელს აქვს რაიმე ნივთი და მე მას ვუკეთებ რესტავრაციას, ინტერპრეტაციას და ვერგები მომხმარებლის სურვილებს.
ზოგადად, ვამზადებ ყველაფერს, რაც შედის საახალწლო დეკორაციებში – ეს არის მთლიანად ინტერიერის მორთულობა, იქნება ეს კიბის მოაჯირი, ბუხარი, ნაძვის ხე; ასევე, საახალწლო სუფრის გაფორმება და ა.შ. ეს არის ძირითადი. ამას მოჰყვება კიდევ ძალიან ბევრი წვრილმანი“, – ამბობს რესპონდენტი და განმარტავს, როგორ იქმნება საკუთარი ნამუშევრების დიზაინი.
„როცა მომხმარებელი მიკავშირდება, რა თქმა უნდა, უპირველეს ყოვლისა, მიკავშირდება იმის გამო, რომ მას მოსწონს ჩემი ნამუშევრები და სურს კონკრეტულად ის. მაგრამ, მე უკვე მასთან ერთად ვაკონკრეტებ – მიგზავნის ინტერიერის ფოტოებს. მაქსიმალურად ვცდილობ, რომ მისი საცხოვრებლის ინტერიერის შესაბამისად იყოს ეს დიზაინი და დეკორაცია მოფიქრებული. ერთმანეთთან ვთანხმდებით და ვჯერდებით იდეებზე“.
როგორც მარიამი აღნიშნავს, მის ნამუშევრებს უცხოელი მომხმარებლებიც ჰყავს, რომელთან კომუნიკაციას მისთვის ძალიან სასიამოვნოა.
„ვერ ვიტყვი, რომ ბევრ უცხოელ მომხმარებელთან მაქვს შეხება, თუმცა, ისინი იძენენ ჩემს ნამუშევრებს. ყველაზე დიდი კომფორტია, როდესაც უცხოელი გიკვეთს ნივთს. მათ არ აქვთ ზედმეტი შეკითხვები, მუდამ იღიმიან, არიან კმაყოფილები და მადლიერები. ქართველი მომხმარებელი ძალიან გემოვნებიანია. ამას აუცილებლად უნდა გავუსვათ ხაზი“.
მასალა მოამზადა : მარიამ ტიელიძემ
