კოვიდპანდემიიდან გამომდინარე, მათ შორის, საბავშვო ბაღების გარკვეულმა ნაწილმა ფუნქციონირება დროებით შეაჩერა. გამომდინარე იქედან, რომ ზოგიერთ მათგანში ინფიცირების შემთხვევები დაფიქსირდა, პრევენციის მიზნით, შესაბამისი ზომების მიღება გახდა საჭირო.
“თბილისი თაიმსი” რამდენიმე მშობელს დაუკავშირდა. ისინი საუბრობენ, როგორ იმოქმედა მათზე საბავშვო ბაღების დროებით დახურვამ და, ზოგადად, რას ფიქრობენ ისინი ამ საკითხთან მიმართებით.
თეონა ტატიაშვილი
სანამ გაიხსნებოდა საბავშვო ბაღები, თავიდანვე გაორებული ვიყავი. არადა, რეალურად, მჭირდებოდა, რომ ბავშვი მიმეყვანა, თუმცა, დაინფიცირების შიშიც არანაკლებ მქონდა. გამომდინარე იქედან, რომ ოჯახში ყველა ვმუშაობთ, ბავშვი გავუშვით ბაღში მაინც. მალევე, მისი ბაღი დაიკეტა და მუდმივად საფიქრალი გვაქვს – დროის მიხედვით ვინაწილებთ მასთან ყოფნას. ეს ძალიან რთულია. აცრას რაც შეეხება, მე და ჩემი მეუღლე აცრილები ვართ. მაგრამ ჯგუფში, რომელშიც ამდენი ბავშვია, ალბათ, წარმოუდგენელიც კია, ყველა მათგანის მშობელი იყოს აცრილი. ცალკე საკითხია პერსონალის ვაქცინაცია – არ ვიცი, რამდენად სავალდებულო უნდა იყოს მათთვის ეს, თუმცა, აშკარად სარიკსოა აუცრელობა.
ანა მათიაშვილი
შემთხვევების დაფიქსირების შემდეგ ჩემი შვილის ბაღი რომ დაიკეტა, მაშინ გამიჩნდა, შეიძლება ითქვას, საკმაო პროტესტი იმასთან დაკავშირებით, რომ დიახ – მშობლები, აღმზრდელები და მთელი პერსონალი აცრილი უნდა იყოს. საფრთე ექმნება მომავალ თაობას, ჩვენ ვალდებულები ვართ – ისინი დავიცვათ. მით უმეტეს, არის ამის საშუალება. უკვე ბევრი დაიწერა და ბევრი ვიცით ვაქცინების უსაფრთხოებაზე. რისკის დროა? არაა, არ არის სიცოცხლისა და ჯანმრთელობის გარისკვის დრო. განსაკუთრებით, როცა საქმე პატარებს ეხებათ.
მარიამ მეტრეველი
ძალიან რთული თემაა, ზოგადად, ვინმეს ვაქცინაციისკენ მოუწოდო. მაგრამ როცა ბავშვებზე ვსაუბრობთ, იქ ზრდასრულებს – მშობლები იქნებიან ეს თუ მასწავლებლები, გაცილებით მეტი მოგვეთხოვება. ბევრი ვიფიქრე, რა ვარიანტი არ განვიხილე და გადავწყვიტე, ბავშვის ჯანმრთელობისა და ჩემი ნერვებისთვის, საერთოდ არ მიმეყვანა ამ ეტაპზე. ძალიან მიჭირს, თუმცა, ხელს გვიწყობენ ბავშვის ბებიები და, ასე თუ ისე, ვუმკლავდებით ამ სიტუაციას. ვისურვებდი, მალე ჩაწყნარდეს სიტუაცია და აღარ გვეშინოდეს ბავშვების გამო“.
მასალა მოამზადა : მარიამ ტიელიძემ
