ქართულ ბაზარზე კიდევ ერთი ახალი ხელნაკეთი სამკაულების ბრენდი გამოჩნდა. „ნინფა“ დაახლოებით ერთი წლის წინ შეიქმნა და სულ მალე მოახერხა განსხვავებული და გამორჩეული პროდუქციით მომხმარებლის მოწონების დამსახურება. „თბილისი თაიმსს“ ბრენდის დამფუძნებელი ფატი კოჩაძე ესაუბრა „ნინფას“ შექმნისა და სამომავლო გეგმების შესახებ.
თქვენ შესახებ რომ მოუყვეთ მკითხველს, როგორ შეიქმნა „ნინფა“?
– პროფესიით დიზაინერი არ ვარ, თუმცა თავიდანვე მომწონდა რაღაცების შექმნა. რამდენიმე წლის წინ მქონდა პატარა სამკერვალო ატელია, სადაც ჩემივე შექმნილი დიზაინით ვკერავდი ტანსაცმელს. თუმცა დროის უქონლობის გამო, მომიწია მისი დახურვა. დაახლოებით ერთი წლის წინ, გადავწყვიტე გართობის მიზნით კვლავ მეცადა რაიმეს შექმნა და დავიწყე საყურეების გაკეთება. ყველას ძალიან მოეწონა, ამიტომ გავაკეთე ფეისბუკის გვერდი და განვათავსე ჩემი ნამუშევრები. ასე გაჩნდა „ნინფა“, რომელიც დღეს დიდი მოწონებით სარგებლობს მომხმარებლებში.
რა მასალას იყენებთ ნამუშევრების შესაქმნელად?
– ერთი წლის განმავლობაში ვაკეთებ ისეთ სამკაულებს, რომლებიც განსხვავებული და გამორჩეულია როგორც დიზაინით, ასევე მასალით. ჩემი ნამუშევრების შესაქმნელად ვიყენებ სხვადასხვა მასალას: თვლებს, ხეს, ნაჭერს. ასევე, განსაკუთრებულ და გამორჩეულ მასალას, რომელიც საქართველოში არ იყიდება შიპორს-რომელსაც აბრეშუმისგან ვამზადებ. მასალას ძირითადად საზღვარგარეთის ქვეყნებიდან ვიწერ. რაც შეეხება მათ, ვინც ალერგიულია, მათთვის მაქვს სპეციალური ვერცხლის საკიდებით ვამზადებ საყურეებს.
რამდენად მოთხოვნადია პროდუქცია ბაზარზე?
– მომხმარებელი ძალიან კარგად შეხვდა ჩემს ნამუშევრებს. მოსწონთ განსხვავებული სტილით შექმნილი საყურეები, რომლებიც ძირითადად ერთი ცალი იქნება და აღარასდროს მეორდება. თითოეული დიზაინს მხოლოდ ერთი ადამიანი ატარებს, რაც მათ კიდევ უფრო განსხვავებულებს გახდით.
როგორია შექმნის პროცესი?
– დიზაინის მოფიქრება, ფორმების შექმნა, მათი დამუშავებას და გაფორმებას- ყველაფერს საკუთარი ხელით ვაკეთებ. ასევე ვქმნი სეზონურ ნამუშევრებს, ზაფხულის კოლექციისთვის ვცდილობ ფერები რაც შეიძლება ფერადი და მხიარული იყოს, ზამთრის კოლექციისთვის პირიქით- მეტად სადა და დახვეწილი.
როგორია ფასები და შეიძლება „ნინფას“ პროდუქციის შეძენა?
– ფასები ძალიან მინიმალურია. რადგან ყველაფერს საკუთარი ხელით ვამზადებ და არ მიწევს მათი გაყიდვა მაღაზიის საშუალებით, ამის გათვალისწინებით ფასები იმაზე უფრო დაბალია, ვიდრე თითოეული მათგანის შექმნისთვის დახარჯული დრო და ენერგია. ნამუშევრის მინიმალური ფასები 20 ლარიდან იწყება და მაქსიმალური ფასი 100 ლარია. ამ ეტაპზე ჯერჯერობით მხოლოდ ფეისბუკის გვერდით ხდება რეალიზაცია.
როგორია „ნინფას“ სამომავლო გეგმები?
– სამომავლოდ ვგეგმავ გავხსნა ჩემი მაღაზია სადაც წარმოდგენილი იქნება აქსესუარები და ასევე, უახლოეს მომავალში კვლავ ვგეგმავ დავიწყო ტანსაცმლის შექმნა. ასე რომ, მომხმარებლებს აქსესუარებთან ერთად ადგილზე ტანსაცმლის შეძენაც შეეძლებათ.
მარიამ ლეკიაშვილი
