დღეს საქართველოს საპატრიარქოში შედგა შეხვედრა, რომელზეც იმსჯელეს თანამედროვე საზოგადოებაში წმინდა წერილის ქადაგებისა და ღვთის სიტყვის მორწმუნეთათვის მართებულად მიწოდების შესახებ.
შეხვედრას უძღვებოდა თბილისის სასულიერო აკადემიისა და სემინარიის პედაგოგი გიორგი გვასალია. შეხვედრას ესწრებოდნენ საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე და სამსახურის წევრი სასულიერო პირები.
როგორც შეხვედრაზე აღინიშნა, დღეს უმთავრესი სასულიერო პირებსა და მრევლს შორის კომუნიკაციაა, ამ მიმართულებით კი თანამედროვე გამოწვევების გათვალისწინება აუცილებელია. აღსანიშნავია ის ფაქტი, რომ საპატრიარქოს საზოგადოებასთან ურთიერთობის სამსახურში მსგავსი ხასიათის შეხვედრები პერმანენტულად იმართება.
„ჩვენ უნდა გვახსოვდეს, რომ ეკლესიის მისია არის ადამიანების მიყვანა ღმერთთან, მიყვანა ერთადერთი საშუალებით, ქადაგებით, მისიონერობით, ქრისტეს დამოწმებით და ეს შესაძლებელი ხდება მხოლოდ მას შემდეგ, რაც ჩვენ გვეცოდინება, თუ რას გვეუბნება ღმერთი“ – აცხადებს თბილისის სასულიერო სემინარიის პედაგოგი გიორგი გვასალია.
შეხვედრას ესწრებოდა არაერთი სასულიერო პირი, რომლებიც გამოთქვავენ მზადყოფნას მსგავსი ტიპის შეხვედრებში შემდგომ მონაწილეობისთვის.
მასალა მოამზადა: თორნიკე ყრუაშვილმა
