2021 წლის 3-4 ნოემბერს გორში გაიმართა ორდღიანი სემინარი საქართველოს მართლმადიდებელი ეკლესიის წარმომადგენლების მონაწილეობით თემაზე „სასულიერო პირების როლი ბავშვის უფლებების დაცვის საქმეში“.
სემინარი საქართველოს საპატრიარქოს ორგანიზებითა და საქართველოში გაეროს ბავშვთა ფონდის (UNICEF) მხარდაჭერით ჩატარდა. მას გორისა და ატენის ეპარქიამ უმასპინძლა. შეხვედრას ესწრებოდნენ გორის და ატენის მიტროპოლიტი ანდრია (გვაზავა), საქართველოს საპატრიარქოს საზოგადოებასთან ურთიერთობის სამსახურის ახალგაზრდული მიმართულების ხელმძღვანელი, მღვდელი გიორგი ფირცხელანი, გორისა და ატენის, სამთავისისა და კასპის, სურამისა და ხაშურის ეპარქიების სასულიერო პირები, საქართველოში გაეროს ბავშვთა ფონდის წარმომადგენლები, მოწვეული ექსპერტები.
სემინარზე აღინიშნა, რომ საქართველოს მართლმადიდებელი ეკლესია ბავშვთა და ახალგაზრდათა პრობლემებს ჩვენი საზოგადოების ერთ-ერთ მთავარ გამოწვევად მიიჩნევს. სასულიერო პირები უნდა იღებდნენ თანამედროვე ინფორმაციას კომპეტენტური ექსპერტებისაგან, რათა დაეხმარონ ოჯახებს გაძლიერებაში, ბავშვებსა და ახალგაზრდებს მარადიული ღირებულებების გათავისებაში.
აღსანიშნავია ისიც, რომ სემინარზე ისაუბრეს ბავშვებისა და ახალგაზრდების წინაშე დღეს არსებულ გამოწვევებსა და მათი გადაჭრის გზებზე. ფაქტია, რომ ამ მიმართულებით ეკლესიის ჩართულობა მაქსიმალურად ორიენტირებული უნდა იყოს მომავალი თაობის საუკეთესო ინტერესებზე, სულიერი და ჯანსაღი ცხოვრების პოპულარიზაციასა და ხელშეწყობაზე.
შეხვედრაზე საინტერესო დისკუსია გაიმართა გაეროს ბავშვის უფლებათა კონვენციის, საქართველოს ბავშვის უფლებათა კოდექსის და ამ დოკუმენტებში არსებული ბავშვთა დაცვის მექანიზმების შესახებ.
მასალა მოამზადა: თორნიკე ყრუაშვილმა
