“ეს ყველაფერი ქმნის საგზაო უსაფრთხოებას” – მოპედისა და კვადროციკლის რეგისტრაცია სავალდებულო გახდა

მოპედისა და კვადროციკლის რეგისტრაცია და შესაბამისი კატეგორიის მართვის მოწმობის აღება სავალდებულო გახდა. აღნიშნული ძალაში 28 მარტიდან შევიდა. რამ განაპირობა ამ ცვლილების საჭიროება, რა შედეგებზეა ის ორიენტირებული და რას უნდა ველოდოთ ამ ყველაფრის შედეგად – ამის შესახებ “თბილისი თაიმსს” ტრანსპორტის საკითხების ექსპერტი, მევლუდ მელაძე ესაუბრა.

“ამის შესახებ საუბარი წლების წინაც იყო. მე გახლდით ერთერთი ინიციატორი, ვინც წამოაყენა საკითხი. რომ სკუტერების რაოდენობა ყველა ვარიანტში მოიმატებდა, რადგან მოთხოვნა იყო ძალიან დიდი და ის კიდევ უფრო გაიზრდებოდა. პირველი იმიტომ, რომ ის – საცობების შემთხვევაში – ყველაზე მოსახერხებელი ტრანსპორტია, მეორე – დელივერისთვის ყველაზე მოქნილია, მესამე – ეკონომიურია და მეოთხე – პარკირებასთან დაკავშირებული საკითხი. ეს პარამეტრები საკმარისი იყო იმისთვის, რომ ამ ტრანსპორტზე მოთხოვნა გაზრდილიყო”, – განმარტავს ექსპერტი.
მელაძე ხაზს უსვამს, რომ იმ დროისთვის ეს საკითხი ასე პრობლემური არ ჩანდა, მაგრამ ფაქტია, რომ მოპედებისა და კვადროციკლების რაოდენობამ იმატა.

“შესაძლოა, მაშინ ეს საკითხი ასე პრობლემური არ ჩანდა, მაგრამ ფაქტი ის არის, რომ რაოდენობამ ისე მოიმატა, ყველაფერმა აბსოლუტურად უკონტროლო სივრცეში გადაინაცვლა – ხდებოდა საგზაო შემთხვევები, მათ შორის, სრულდებოდა ფატალური შედეგითაც; გაურკვეველი რჩებოდა, ვინ იყო დამრღვევი, ტრანსპორტის მფლობელი. მოპედი ფასდებოდა, როგორც ჩვეულებრივი ველოსიპედი. არ აღიქმებოდა სატრანსპორტო საშუალებად. შესაბამისად, იმიტომ, რომ ამ მხრივ სრულად უკონტროლო სიტუაცია არ ყოფილიყო, საჭირო გახდა კანონის მიღება სასწრაფო წესით, რომელიც, მინიმუმ, მათ რეგისტრაციას გაითვალისწინებდა და შემდგომ უკვე – მართვის მოწმობას.

მე მაშინაც ვფიქრობდი და ახლაც ვფიქრობ, რომ 14 წლიდან უნდა შეეძლოს დაბალი სიმძლავრის მოპედის მართვა ნებისმიერ ადამიანს იმიტომ, რომ ის ამისთვის მზად არის. ამის მაგალითია არაერთი ევროპული ქვეყანა, სადაც 14 წლიდან აქვთ უფლება, მართონ ტრანსპორტი, რომელსაც 50 კმ.სთ-მდე შეუძლია, რომ იაროს. რეალურად, ეს არის ველოსიპედის სიჩქარე და რატომაც არის, გადაადგილების ძალიან კარგი საშუალებაა. თუმცა, საბოლოოდ, ჩვენთან მაინც გადაწყდა, რომ ეს ასაკი იყოს 16 წელი. ძირითადი მიზეზი უსაფრთხოებაა. ეს ყველაფერი, ერთმანეთზე მიბმული, ქმნის საგზაო უსაფრთხოებას”, – განაცხადა მევლუდ მელაძემ და აღნიშნა, რომ გარკვეული დროის შემდეგ იქნება შესაძლებელი საუბარი იმის შესახებ, რამდენად ეფექტური აღმოჩნდა ცვლილება.

“რამდენად შედეგიანი იქნება ეს ცვლილება, ამაზე გარკვეული დროის გასვლის შემდეგ იქნება შესაძლებელი საუბარი. თუმცა, რაც უკვე ზუსტად ვიცი, არის ის, რომ ვისაც არ ჰქონდა მართვის მოწმობა და მართავდა მაღალი სიმძლავრის სკუტერებს, თითქოსდა, ის იყო დაბალი კუბატურის, ეს მოცემულობა აღმოიფხვრა. რადგან უკვე ტრანსპორტს აქვს სანომრე ნიშანი, უკვე ცნობილია, ის დაბალი სიმძლავრის არის თუ – მაღალი”, – განაცხადა ტრანსპორტის საკითხების ექსპერტმა.