დღეიდან, თბილისში მოსახლეობის საყოველთაო აღწერის მოსამზადებელი სამუშაოები დაიწყო, რომელიც დედაქალაქში არსებული შენობებისა და მათში ფაქტიურად მცხოვრები ოჯახების სიები შედგენას ითვალისწინებს. ამისთვის საქსტატმა მოამზადა 800 რეგისტრატორი, რომელიც ზემოაღნიშნულ სამუშაოებს 14 დღის განმავლობაში ჩაატარებს.
საქართველოს მოსახლეობის 2014 წლის საყოველთაო აღწერის ფარგლებში, აღწერის მოსამზადებელი სამუშაოები უკვე ჩატარდა აჭარაში, გურიასა და კახეთში. ოჯახების სიების შედგენა მთელი საქართველოს მასშტაბით 2014 წლის მაისისთვის დასრულდება. საყოველთაო აღწერის მოსამზადებელ სამუშაოებზე სულ 4 ათასი ადამიანი დასაქმდება.
მოსახლეობის საყოველთაო აღწერა, მოსამზადებელი სამუშაოების დასრულების შემდეგ, 2014 წლის 5-19 ნოემბერს ჩატარდება. ამ მიზნისთვის შეირჩევა 15 ათასი ადამიანი, რომელიც მოსახლეობას სპეციალური კითხვარების მეშვეობით ინდივიდუალურად გამოკითხავს.
საქართველოს მოსახლეობის აღწერის საკოორდინაციო სამთავრობო კომისიამ საქართველოს მოსახლეობის 2014 წლის საყოველთაო აღწერის პროგრამა და სამოქმედო გეგმა 2013 წლის 2 აპრილს, თავის პირველ სხდომაზე დაამტკიცა. კომისიის გადაწყვეტილებით, საქართველოს მოსახლეობის საყოველთაო აღწერა 2014 წლის 5-19 ნოემბერს ჩატარდება.
14.11.13
