პატარა საქართველოს რომ ამოუწურავი რესურსი აქვს, ეს დიდი ხანია, ცხადია. ამ მასალაში “ზანდურის სახლის” შესახებ გიამბობთ. უკვე სამი წელია, რაც ის არსებობს. მშენებლობა ამ დროს დაიწყო. ამ ზაფხულს კი ორი წელი გახდება, რაც ოფიციალურად შევიდა ექსპლუატაციაში. “თბილისი თაიმსს” მანონი ახვლედიანი უამბობს, რა არის “ზანდურის სახლი”
“ზანდური ხორბლის უძველესი, ენდემური, ლეჩხუმური სახეობაა. მსოფლიოში ხორბლის 20-მდე სახეობაა და აქედან ხუთია ქართული. ამ ხუთიდან ორი – მახა და ზანდური გახლავთ ლეჩხუმის ენდემური, აქ აღმოჩენილი და ამიტომაც მიაკუთვნეს ჩვენს მხარეს. როცა მეცნიერებმა ზანდურის შესწავლა დაიწყეს, მხოლოდ აქ, ლეჩხუმში ნახეს მასიური ნაკვეთები, თუმცა, ძირითადად, მთიანი კოლხეთისთვის დამახასიათებელი ენდემური სახეობაა”, – ამბობს რესპონდნენტი.
მანონი ახვლედიანი გვიყვება, რა გახდა გარდამტეხი მიზეზი, რამაც მას მიაღებინა გადაწყვეტილება, მეტი გაეგო ზანდურის შესახებ და, შედეგად, შექმნილიყო “ზანდურის სახლი”.
“სამი წლის წინ თბილისიდან ასპირანტები იყვნენ ჩამოსული. დავესწარით მათ ლექციას ზანდურზე ცნობიერების ამაღლებისთვის. მათ ჰქონდათ შერჩეული 4 სკოლა რაჭაში და 4 – ლეჩხუმში.
მე სკოლაში ვასწავლი და აღნიშნულ ლექციაზეც მოვხვდი. ზანდურის შესახებ რომ გავიგონე, ჩემთვის ეს სიტყვა იყო ძალიან ახლობელი, რადგან როდესაც ბებიაჩემი თონეში აცხობდა, ყოველთვის ზანდურის პურზე საუბრობდა, როგორი გემრიელი და არომატული იყო ის. რაც დრო გავიდა და გავიგე, რა ყოფილა ზანდური, დიდი აღტაცება დამეუფლა. ავიტაცე ეს თემა და დავიწყე ზანდურთან დაკავშირებული ინფორმაციების მოპოვება. გაზაფხულზე დავთესეთ ზანდური. ამასობაში, მე გადავწყვიტე, მომეწყო კუთხე, სადაც გამოვფენდი მათ. ჩემს სახლი რაღაც ნაწილი შევარემონტეთ და გაჩნდა პატარა შენობა, სადაც შევინახავდი მოსავალს და ვაჩვენებდი სტუმრებს.
წარმოების დაწყებას ვერ ვახერხებდით, რადგან საკმაო ხარჯებთან არის დაკავშირებული. არც თანამედროვე ტექნიკა გვაქვს, რომელიც ზანდურის მოყვანაში დაგვეხმარებოდა. ჩვენი მხარე მთიანია და რთულია დამუშავება. ვიფიქრე, მიმართულება შემეცვალა და ტურისტული კუთხე გამეკეთებინა, რადგან ადამიანების დაინტერესება იყო ძალიან დიდი. როდესაც ზანდურის სახლი აშენება დავიწყეთ, გადავწყვიტე, მარანიც გამეკეთებინა. უკვე შემდეგ კი – გავაკეთე საოჯახო სასტუმრო”, – ამბობს მანონი ახვლედიანი.
