მოგეხსენებათ, რომ გუშინ ცნობილი გახდა ევროკომისიის გადაწყვეტილება საქართველოს, მოლდოვასა და უკრაინასთან დაკავშირებით ევროკავშირის კანდიდატის სტატუსის მიღებაზე.
ევროკომისიის მოსაზრებითა და რეკომენდაციით მოლდოვამ და უკრაინამ უნდა მიიღოს კანდიდატის სტატუსი, ხოლო საქართველოს ეძლევა ევროკავშირში გაწევრიანების პერსპექტივა, თუმცა მნიშვნელოვანია შეასრულოს 12 მოთხოვნა წლის დასრულებამდე.
აღნიშნულ საკითხს, ამერიკიდან ემიგრანტი, SBC Legal-ს იურისტი, პირველი ქართველი, რომელმაც ,,ნიუ-იორკის უნივერსიტეტის” სამაგისტრო პროგრამაზე სრული დაფინანსება მოიპოვა, ონისე წულაია გამოეხმაურა, რომელიც სამოქალაქო აქტივიზმითაც გამოირჩევა. ონისემ აღნიშნა, რომ თუ პრობელმას კარგად ჩავუღრმავდებით შევამჩნევთ, რომ საფრანგეთი და გერმანია სამარცხვინოდ ცდილობს ივაჭროს რუსეთთან ქართველის სისხლით.
The tbilisi times ონისეს პოსტრს უცვლელად გთავაზობთ:
“პერსპექტივა რომ გვქონდა, ვიცოდით და ახლა რომ გაგვიმეორეს უნდა ვიზეიმოთ? ვიღაცას ეწერა, გეოპოლიტიკურად რომ ევროპა ვართ, ეგ მაინც ხომ გამოჩნდაო. არ გრცხვენიათ? ზურაბ ჟვანიამ განცხადება რომ გააკეთა, მე ვარ ქართველი და, მაშასადამე, ევროპელიო, 20 წლის შემდეგ დღეს დაგვიდასტურეს და ეს უნდა გვიხაროდეს? ვისი დასტური გვჭირდებოდა ამაზე? ვინმეს წყალი რომ სთხოვო და სამადლოდ შემოგაფურთხოს, ისე დაგვემართა. მადლობა! ჩვენს ქვეყანას ყველაზე მეტად უსაფრთხოების გარანტია სჭირდებოდა ამ ვითარებაში და ვითხოვეთ პოლიტიკური ნების გამოხატვა ამ კანდიდატის სტატუსის მოთხოვნით. ყველამ კარგად ვიცით რეფორმების და ოლიგარქების პრობლემა, ვიცით რომ გვყავს სამარცხვინო მთავრობა, ვიცით და ამიტომ იყო ეს კანდიდატის სტატუსზე კენჭისყრა და არა წევრად მიღებაზე. რა გზავნილია ეს რუსეთისთვის? პირდაპირ უთხრეს: აგერაა კავკასია – საქართველო აზერბაიჯანი და სომხეთი, თუ ხორცის ძიძგვნა გწადია, ჩვენ არ შეგიშლით ხელსო. ვისზე ნაკლებად მინდა ეს იყოს სიცრუე? მაგრამ თუ პრობელმას მხოლოდ კრიტერიუმებში დავინახავთ და დიდ სურათში გამოგვრჩება საფრანგეთისა და გერმანიის სამარცხვინო მზაობა ივაჭროს რუსეთთან ქართველის სისხლით, ამით ვერ შევალთ ამ კავშირში ვერასდროს. არავინ გამომიხტეს კომენტარებში, თითქოს, გერმანიის მხარდაჭერა გვაქვს, ანგელა მერკელთან შეხვედრაზე კანცლერმა პირში გვითხრა: რა ნატო და რა ევროკავშირიო? თანამშრომლობის სხვა “არასაწევრო” ფორმატზე გვესაუბრა. ვციტირებ ანგელა მერკელის ნათქვამს, რომელმაც შოკში ჩამაგდო შეხვედრაზე: “არათუ წევრობა, თქვენი წევრობის პერსპექტივაზეც კი არ აპირებს ევროპა საუბრის დაწყებას”. ამის მერე, სოციალურ ქსელში მოსმენილ ენთუზიაზმს, თითქოს, კრიტერიუმები გვიწყვეტდეს რამეს, ვერ ვხვდები და არ მესმის. გაცილებით დიდი პრობლემის წინაშე ვართ, ვიდრე ჩვენ ვფიქრობთ და სანამ პრობლემას მთლიანად არ დავინახავთ, რის მოგვარებაზე და დაკმაყოფილებაზე მსჯელობთ, ხალხო?”
