დღეს, მთავრობის ადმინისტრაციაში ვიშეგრადის საერთაშორისო ფონდის საჯარო მოხელეების მობილურობის პროგრამის (Civil Servants Mobility Programme) ფარგლებში მიმდინარე პროექტის პრეზენტაცია გაიმართა. პრეზენტაცია ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა და საქართველოში ვიშეგრადის ქვეყნების – პოლონეთის სრულუფლებიანმა და საგანგებო ელჩმა ანდრჟეი ჩიეშკოვსკიმ, ჩეხეთის რესპუბლიკის სრულუფლებიანმა და საგანგებო ელჩმა ტომაშ პერნიცკიმ, სლოვაკეთის რესპუბლიკის ელჩის მოვალეობის შემსრულებელმა რუდოლფ მიხალკამ და უნგრეთის ელჩის მოადგილემ იშთვან გუებნარმა წარადგინეს. როგორც “თბილისი თაიმსს” სამინისტროდან აცნობეს, პროექტის თანახმად, საქართველოდან 12 საჯარო მოხელე პრაქტიკული ცოდნის მიღების მიზნით გაემგზავრება ვიშეგრადის ქვეყნებში (სლოვაკეთის რესპუბლიკა, უნგრეთი, ჩეხეთის რესპუბლიკა, პოლონეთის რესპუბლიკა). ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის აპარატისა და ვიშეგრადის საერთაშორისო ფონდს შორის გამართული კონსულტაციების შედეგად სამინისტროებიდან წარმოდგენილი კანდიდატები გადანაწილდნენ ოთხ თემატურ ჯგუფად: 1. ეკონომიკა; 2. თავისუფლება, უსაფრთხოება და მართლმსაჯულება; 3. ასოცირების შეთანხმების განხორციელების კოორდინაცია; 4. დარგობრივი თანამშრომლობა. თითოეულ ჯგუფში წარმოდგენილი იქნება სამი საჯარო მოხელე სხვადასხვა დარგობრივი უწყებიდან. აღნიშნული პროექტის განხორციელება ხელს შეუწყობს ცენტრალური და აღმოსავლეთ ევროპის ქვეყნების გამოცდილების გაზიარებას ევროინტეგრაციის კუთხით და ამ მიმართულებით საუკეთესო პრაქტიკის დანერგვას საქართველოს შესაბამის უწყებებში. 31.10.14