ჩვენ კონკურენციის საუკუნეში ვცხოვრობთ – ეპოქაში, რომელშიც ადამიანები ინოვაციებისა და განტვირთვისკენ არიან მიდრეკილები. შესაბამისად, ამ კონკურენციაში იმარჯვებს კრეატივი და სიახლე. რაც უფრო არაორდინალურია ახალი პროდუქტი, მით მეტია მის მიმართ დაინტერესება – თუმცა, ცხადია, ახალი იდეა მხოლოდ იმის გამო კი არ უნდა იყოს საინტერესო, რომ ის ახალია, არამედ წარმატებისთვის აუცილებელია, მან შეინარჩუნოს საზოგადოება. ამისთვის კი მუდმივი განახლებაა საჭირო.
“მისმიე” პირველი მათრობელა კარტია საქართველოში – მისი არსებობის მიზეზი მარტივია – გახადოს თავშეყრა ბევრად საინტერესო. ის არის ბიზნესი, რომელიც სწორედ ჩვენი საუკუნის ბობოქარ ინტერესებსა და სურვილებს პასუხობს.
“თბილისი თაიმსს” “მისმიეს” დამფუძნებელი, დირექტორი, დავით ხურცილავა ესაუბრა.
რამდენი ხანია, რაც არსებობთ?
კომპანია დაარსდა 2020 წლის 14 აგვისტოს, ხოლო პირველი პროდუქტი გაიყიდა 20 აგვისტოს. ამჟამად, ჩვენი არსებობის ისტორია თვე-ნახევარს ითვლის.
დეტალურად რომ გვითხრათ, რას მოიცავს “მისმიე”?
“მისმიე” პირველი ქართული დასალევი სამაგიდო თამაშების ბრენდია. ჩვენი მისიაა, გარდავქმნათ დალევის პროცესი თამაშად და მივცეთ ადამიანებს შესაძლებლობა, დაამყარონ ან განაახლონ ურთიერთობები გართობის პროცესში. ჩვენ გთავაზობთ ახალ და მუდმივად განვითარებად სახალისო აქტივობებს, რათა თითოეული ყლუპი გახდეს უფრო სასიამოვნო და მხიარული.
„დამისხი დამალევინე“ ჩვენი პირველი პროდუქტია. ეს არის დასალევი სამაგიდო თამაში, რომელიც შედგება 100 ბარათისგან. თითოეულ ბარათზე დატანილია დავალება, რომელსაც მოთამაშეები ასრულებენ ან სვამენ.
წესები მარტივია. ერთმანეთის მიყოლებით, საათის ისრის მიმართულებით იღებთ კარტს, ხმამაღლა კითხულობთ და ასრულებთ მასზე დატანილ დავალებას. წინააღმდეგ შემთხვევაში, სვამთ. თუ მძიმე ალკოჰოლური სასმლის გამოყენებით თამაშობთ, შეგიძლიათ, შეამციროთ დალევის რაოდენობა. ნებისმიერ მოთამაშეს შეუძლია, ნებისმიერ დროს გამოეთიშოს თამაშს. ცარიელ ბარათებზე შეგიძლიათ, დაიტანოთ თქვენ მიერ მოფიქრებული დავალებები და ამით კიდევ უფრო გაახალისოთ თამაშის პროცესი.
ბევრია დაინტერესებული თქვენით?
საზოგადოებაში “მისმიემ” თავიდანვე დიდი დაინტერესება გამოიწვია. დაახლოებით, 1 თვეში სოციალურ გვერდებზე 3000-ზე მეტი გამომწერი შემოგვემატა. ძირითადად, 18-დან 36 წლამდე ადამიანების სეგმენტია დაინტერესებული ჩვენი პროდუქტით. გარდა ამისა, ვთანამშრომლობთ თბილისში სხვადასხვა ბარსა და მაღაზიასთან. ბარებისთვის პროდუქტი ძალიან მომგებიანი აღმოჩნდა, რადგან ის ზრდის სასმლის გაყიდვების რაოდენობას, დაახლოებით, 30-40%-ით.
სამომავლოდ, იდეის გაფართოებას თუ გეგმავთ?
ახლო მომავალში “მისმიეს” კიდევ მრავალი პროდუქტი დაემატება, რომელსაც ახლა ვერ გაგიმხელთ, თუმცა, თანდათანობით ჩვენი მომხმარებელი მიიღებს ამ სიახლეებს ჩვენი სოციალური ქსელების საშუალებით. ძირითადი აქცენტი დასალევ სამაგიდო თამაშებზე იქნება გაკეთებული, თუმცა, ვგეგმავთ სხვა სეგმენტებზე გასვლასაც და ისეთი საინტერესო თამაშობების დამატებას, რომელთა ძირითადი არსიც არა დალევა, არამედ, უბრალოდ, შეკრებების გახალისება იქნება.
მასალა მოამზადა : მარიამ ტიელიძემ
