„ხელოვნებით არის მოცული მთელი ჩემი ცხოვრება“ – ამბობს „თბილისი თაიმსთან“ საუბრისას ეთო ივანელაშვილი. ის ხელოვნებათმცოდნეა. ამ ეტაპზე, ის ბუნებრივად გამშრალი, მინდვრის ყვავილებისგან კომპოზიციებს ქმნის. ეთოს სახელოსნოში უამრავი ფერადი, ლამაზი, უნიკალური ნამუშევარი იქმნება.
„პროფესიით ხელოვნებათმცოდნე ვარ, ასევე, ვმუშაობ საჯარო სკოლაში ხელოვნების მასწავლებლად. მთლიანად ვარ ამ სფეროში ჩართული, რაც ძალიან მაბედნიერებს. მუდმივად ძიების პროცესში ვარ და ვცდილობ, რომ აღმოვაჩინო საინტერესო მიმართულებები და ტექნიკები ხელოვნებაში. ძალიან მიყვარს ასევე ძველი ნივთების განახლება“.
დეტალურად, რას ამზადებთ?
HerbalArt-ჰერბალ არტი არის ხელნაკეთი ნივთების მცირე სახელოსნო, ძირითადად, ვამზადებ ხელნაკეთ აქსესუარებს ბუნებრივად გამშრალი ყვავილების კომპოზიციებით, რომელიც მოთავსებულია ორმაგ მინაში და უკეთდება მეტალის კარკასი, გულსაკიდები, საყურეები და გულსაბნევები. ასევე, ვქმნი მოზრდილი ზომის პანოებს, სადაც კომპოზიციები მთლიანად არის აწყობილი გამშრალი ყვავილებით.
საინტერესოა, ეს მიმართულება როგორ შეისწავლეთ?
ამ მიმართულებით ჩემი დაინტერესება მცენარეების სიყვარულმა განაპირობა, გადავწყვიტე – გამეკეთებინა ჰერბარიუმები სხვადასხვა ყვავილით და შემექმნა კომპოზიციები, პირველივე მცდელობა მართლაც საუკეთესო გამოვიდა და გადავწყვიტე უფრო აქტიურად შემესწავლა ეს ტექნიკები. დამოუკიდებლად, ინტერენეტრესურსების ვიდეოტუტორიალების დახმარებით ვისწავლე მცენარის სწორად გაშრობა, რომ ფერი არ დაკარგოს, სათანადო მინების სისქის შერჩევა და მათი დაჭრა, ასევე, მეტალის კარკასების შექმნა, დღემდე სწავლების პროცესში ვარ და ვხვეწ ტექნიკებს.
ამ მხრივ, როგორია კონკურენცია – საქართველოში ბევრი ამზადებს მსგავს ნამუშევრებს?
ჩემთვის კონკურენცია ამ მიმართულებით არ არსებობს, თითოეული ნამუშევარი, რომელსაც ჰქმნიან შემოქმედი ადამიანები, ჩემთვის უკონკურენტოა და ყოველთვის ძალიან მახარებს მათი წარმატება. დღეს ვინც გამშრალი ყვავილებით ქმნის აქსესუარებს, თითქმის ყველა იყენებს ეპოქსიდს, თხევად მინას და ნამშევრის შექმნაც უფრო მეტად მარტივია ამ მასალით. მე თავიდანვე უარი ვთქვი ეპოქსიდის გამოყენებაზე, მართალია – შედარებით დიდი დრო მჭირდება ნამუშევრის შესაქმნელად, თუმცა, თითოეული კომპოზიცია არის ინდივიდუალური და გამორჩეული.
მათ მიმართ ინტერესი როგორია – ბევრი მომხმარებელი გყავთ?
ბოლო პერიოდში ხელნაკეთი ნივთების მიმართ საზოგადოების ინტერესი მეტად გაიზარდა, თუმცა, ძირითადათ, მაინც მდედრობითი სქესის წარმომადგენლები ინტერესდებიან აქსესუარებით. ჩემი მცირე სახელოსნოც ახალი წამოწყებაა და ჯერ მხოლოდ სოციალური ქსელების მომხმარებლები იცნობენ, თუმცა, იმედი მაქვს, რომ სამომავლოდ აქტიურად შევუერთდები ხელნაკეთი ნივთების გამოფენებს.
