ევროკავშირის წევრმა ქვეყნებმა ზამთარში გაზის მოხმარების 15%-ით ნებაყოფლობითi შემცირების შესახებ პოლიტიკურ შეთანხმებას მიაღწიეს. ამის შესახებ ევროპული საბჭოს განცხადებაშია ნათქვამი.
კერძოდ, ქვეყნები შეთანხმდნენ გაზის მოთხოვნა 15%-ით შეამცირონ გასული ხუთი წლის საშუალო მოხმარებასთან შედარებით, 2022 წლის 1-ლი აგვისტოდან 2023 წლის 31 მარტამდე.
გარდა ამისა, ევროპულმა საბჭომ გარკვეული გამონაკლისები დაუშვა, რაც წევრი ქვეყნების კონკრეტულ მდგომარეობას ითვალისწინებს. ევროპული საბჭო დათანხმდა, რომ წევრი ქვეყნები, რომლებიც არ არიან დაკავშირებული სხვა წევრი ქვეყნების გაზის ქსელებთან, თავისუფლდებიან გაზის სავალდებულო შემცირებისგან, რადგან ისინი ვერ შეძლებენ მილსადენის გაზის მნიშვნელოვანი მოცულობის გამოთავისუფლებას სხვა წევრი ქვეყნების სასარგებლოდ.
„გაზზე მოთხოვნის შემცირების მიზანია დაზოგვა ზამთრის წინა პერიოდში, რათა მოვემზადოთ რუსეთიდან გაზის მიწოდების შესაძლო შეფერხებისთვის, რასაც ის მუდმივად იყენებს, როგორც იარაღს“, – ნათქვამია განცხადებაში.
