2022 წლის მეორე კვარტალში საქართველოში საშუალო თვიური ნომინალური ხელფასი გასული წლის შესაბამის პერიოდთან შედარებით 16.1 პროცენტით (213,3 ლარით) გაიზარდა და 1 541.3 ლარი შეადგინა. ინფორმაციას ამის შესახებ საქსტატი ავრცელებს.
საკითხს “თბილისი თაიმსთან” საუბრისას ეკონომიკის ექსპერტი, იოსებ არჩვაძე აფასებს.
“როდესაც ეკონომიკაში იქმნება მეტი დამატებითი ღირებულება, არის შესაძლებლობა, რომ იმ ადამიანებს, რომლებმაც ეს დამატებითი ღირებულება შექმნეს, მეტი გასამრჯელო შეხვდეთ. მაღალ კორელაციაშია ერთმანეთთან ეკონომიკური ზრდა და შრომის ანაზღაურება. ისიც უნდა გავითვალისწინოთ, რომ შრომის ანაზღაურებამ საგრძნობლად გადაუსწრო ინფლაციის ტემპს – დაახლოებით, ხუთი პუნქტით მაინც. ასე რომ, არა მხოლოდ ნომინალურ განზომილებაში, რეალურ განზომილებაშიც გვაქვს, საშუალოდ, 4-პროცენტიანი ზრდა ხელფასისა.
ეს არის მნიშვნელოვანი მიღწევა და არ არის ადეკვატური იმის შესახებ საუბარი, რომ მოსახლეობა გაღატაკდა და მისი მდგომარეობა გაუარესდა. გარდა იმისა, რომ გაიზარდა საშუალო ხელფასი, გაიზარდა ასევე დაქირავებით დასაქმებულთა რაოდენობა – 4-ზე მეტი პროცენტით. ამის შესახებ ცნობა ცოტახნის წინ გამოქვეყნდა. ჩემი პირადი გაანგარიშება რომ გითხრათ, 200 მილიონ ლარზე მეტი შემოსავალი მიიღეს დასაქმებულებმა, ჯამურად, ერთ თვეში, წინა წლის ანალოგიურ პერიოდთან შედარებით. მე ვფიქრობ, ეს საკმაოდ სოლიდური მატებაა”, – განაცხადა იოსებ არჩვაძემ.
ცნობისთვის, საშუალო ხელფასის სიდიდის მიხედვით რეგიონებში ლიდერობს თბილისი და მცხეთა-მთიანეთის რეგიონი.
