ჩვენთვის, ქართველებისთვის განსაკუთრებულად ახლობელია ის პროდუქტი, რომელიც საუკუნეებთან, ტრადიციებსა და ისტორიასთან არის დაკავშირებული. დღეს არაერთი ბრენდი ემსახურება მიზანს, რომ ეს ყველაფერი შენარჩუნდეს და არ დაიკარგოს ჩვენი ქვეყნის ის მახასიათებლები, რომლებიც მას მსოფლიოში გამოარჩევს, “სავსე ხურჯინი” გახლავთ საწარმო, რომელიც მომხმარებლებს ქართულ ტრადიციულ ტკბილეულს სთავაზობს. პროდუქტი აბსოლუტურად ნატურალურია და არაერთი სასარგებლო თვისებით ხასიათდება. უფრო დეტალურად, “თბილისი თაიმსს” თინათინ გულხადარაშვილი ესაუბრა.
რამდენი ხანია, რაც „სავსე ხურჯინი“ არსებობს?
„სავსე ხურჯინი“ საოჯახო საწარმოა, რომელიც ქართული ტკბილეულის მოყვარულებს ტრადიციული წესით დამზადებულ პროდუქტს სთავაზობს. საწარმო დაარსდა 2016 წელს და დღემდე უწყვეტად ახორციელებს საქმიანობას.
რას სთავაზობთ მომხმარებლებს?
მომხმარებლებს ვთავაზობთ ტრადიციული წესით დამზადებულ ქართულ ტრადიციულ ტკბილეულს, როგორიცაა: ჩურჩხელა, ჩირი, ტყლაპი, მურაბა/ჯემი, ღვინო და სხვა მრავალი პროდუქტი, რომელიც ადგილობრივი ნედლეულისგან მზადდება და 100%-ით ნატურალურია. არ შეიცავს შაქარს, მარილს, გოგირდს და სხვა მავნე ნივთიერებებს.
ძალიან მნიშვნელოვანია ის ფაქტიც, რომ, ტრადიციულ ტკბილეულთან ერთად, გვაქვს ისეთი სახეობები, რომლებიც არ ჰქონდათ ტრადიციისამებრ ჩვენს წინაპრებს, მაგრამ მოთხოვნიდან გამომდინარე ვცდილობთ, სიახლეებით შევხვდეთ ყოველი წლის გამოწვევას. მაგალითად, გასულ წელს ჩვენს მომხმარებლებს ტრადიციულ, ნიგვზისა და თხილის ჩურჩხელასთან ერთად შევთავაზეთ არატრადიციული მინი ჩურჩხელა, „ჩირის კოკლოზინა“, რომელიც მზადდება შავი ქლიავის და ნიგვზის კობინაციით ამოვლებული თათარაში. ასევე, გვაქვს შავი ქლიავის მურაბა ნიგვზით და სხვა სახეობები, რომლებით დავაკავშირეთ გემოებით ერთმანეთთან და კარგი შედეგები მივიღეთ.
მთელ საქართველოს მოიცავთ?
„სავსე ხურჯინი“ ონლაინ შეკვეთებზე მუშაობს და შეუძლია მთელი საქართველოს მასშტაბით მომსახურება. თუმცა, ძირითადად, გვიკვეთავენ თბილისიდან, ქუთაიდან, ბათუმიდან (საქართველოს დიდი ქალაქებიდან).
როგორ შეაფასებთ უცხოელების ინტერესს თქვენი პროდუქტის მიმართ?
წლებია, ჩვენი ჩურჩხელებით ტკბებიან ლონდონში, მოსწონთ და მუდმივად გვიკვეთავენ. იციან, რომ საუკეთესო ჩურჩხელა საქართველოში მზადდება. მოგეხსენებათ, ბოლო რამდენიმე თვეა, საქართველოშიც მომრავლდნენ უცხო ქვეყნების მოქალაქეები. მათგან დაინტერესებას ძირითადად ფესტივალებზე ვგრძნობთ, როდესაც მოდიან და ყიდულობენ, აშკარად მოსწონთ, რადგან რამდენჯერმე იყო შემთხვევა, ერთმა და იმავე პიროვნებამ მოგვძებნა და კიდევ შეიძინა ჩვენგან ჩურჩხელა, ჩირი და სხვა პროდუქტი.
რამდენად ხშირად გაქვთ სიახლეები?
ხშირად მომხმარებელი თავად გვკარნახობს, რა უნდა გავაკეთოთ. არიან მომთხოვნები და ვფიქრობ, ეს კარგია, არ გვაძლევენ მოდუნების საშუალებას. მოსწონთ, როცა არჩევანის საშუალება აქვთ, ამას ირჩევენ ერთ საწარმოში და არ უწევთ აქეთ იქეთ სიარული. მაგალითად – არის მომხმარებელთა ჯგუფი, რომელიც ყიდულობს არა ერთ რომელიმე სახეობა პროდუქტს, არამედ – რამდენიმეს ერთად, მაგალითად: ჩურჩხელა, მურაბა, ჩირი. ასევე, ეძლევათ საშუალება, აარჩიონ სასაჩუქრე ტკბილეულის ნაკრები, რაც ყველა სახეობის ტკბილეულს აერთიანებს. მათ შეუძლიათ, თავად აირჩიონ ტკბილეულის სახეობები და თავად შექმან სასაჩუქრე ნაკრებები. რადგან ჩვენი პროდუქტი მაინც სეზონურად მიიჩნევა, ვცდილობთ, ყოველი სეზონი რაღაც უმნიშვნელო დეტალით გავხადოთ მრავალფეროვანი.
ერთ საიდუმლო გეგმას გაგიმხელთ, ძალიან მალე ჩვენი მომხმარებლებისთვის გვექნება უგლუტეინო ჩურჩხელა. ვფიქრობ, ეს იდეა მოწონებას დაიმსახურებს და ჩვენს პროდუქციასაც ერთი მნიშვნელოვანი სახეობა შეემატება.
უახლოეს პერიოდში რა გეგმები გაქვთ?
რაც უფრო ღრმად შევედით წარმოებაში, სულ უფრო და უფრო მიმძაფრდება სურვილი, რომ რაც შეიძლება მალე შევქმნათ ჩურჩხელა ბრენდი, რომელიც დამზადდება წელიწადში მხოლოდ განსაზღვრული რაოდენობა და არ დაეკარგება მას ტრადიციულის მნიშვნელობა. მოგეხსენებათ, ქართულ და აარამხოლოდ ქართულ ბაზარზე ჩურჩხელა არცთუ ისე იშვიათობაა, ტრადიციულ ქართულ ჩურჩხელას თავისი ღირებულება შემადგენლობიდან გამომდინარე ჰქონდა. ამიტომ, არ მინდა, ამან დაკარგოს ავთენტურობა და გაიგივდეს სხვა მიმსგავსებულ ჩურჩხელებთან. ეს არ ვიცი, რამდენად უახლოესი პერიოდის გეგმაა, თუმცა, ვფიქრობ, ჩვენ ამას შევძლებთ.
