ჩვენთვის ძალიან საინტერესო და მისაღები შემოთავაზებაა, როდესაც ბიზნესი გვეუბნება, რომ პროდუქტზე აქვს ფასდაკლება. ცხადია, ეს ფინანსების დაზოგვის საშუალებას გვაძლებს. თუმცა, ხშირად, ალბათ, არც კი ვფიქრობთ, რა დგას ამ შემოთავაზების უკან.
სოფო გოლეთიანი, გაყიდვების სპეციალისტი “თბილისი თაიმსს” ესაუბრა.
როგორც მან განმარტა, კომპანიისთვის ფასდაკლების მიზანს მისი მომხმარებლის დაჯილდოება წარმოადგენს. აქვე, რესპონდენტი აღნიშნავს, რომ ფასდაკლებას ბიზნესი სხვადასხვა გარემოებაში მიმართავს. სოფო გოლეთიანს ამის ოთხი ძირითადი მიზეზი მოჰყავს.
“ერთერთია, როდესაც პროდუქტი ახალია და ის ბაზარზე შემოდის – ბიზნეს გაკეთებული აქვს კონკურენტუნარიანი ანალიზი და იმისთვის, რომ მან უცებ მოიპოვოს პოზიციონირება, მალევე დაიმკვიდროს ადგილი, აკეთებს ფასდაკლებას. ამით ის ცდილობს, ნაკლები ძალისხმევით, მოექცეს ყურადღების ცენტრში. ხშირ შემთხვევაში, თუ პროდუქტი არ არის გამართული, ამ მეთოდს აქვს მოკლევადიანი ეფექტი. ერთჯერადად შესაძლოა, ვიყიდო იმიტომ, რომ ახალია და ფასი აქვს მიმზიდველი, მაგრამ როგორც კი მიხვდება, რომ ხარისხი არ არის შესაბამისი. მომხმარებელი უბრუნდება ჩვეულ პროდუქტს, რაც მისთვის მისაღები იყო იქამდეც. 90-იანმა წლებმა დაგვიტოვა მოლოდინი, რომ იაფი პროდუქტი ცუდია.
მეორე – ძალიან ხშირად, ფასდაკლებას კომპანიები მიმართავენ იმ შემთხვევაში, როდესაც პროდუქტი არის “ჩაწოლილი“. ეს ნიშნავს, რომ, ბევრი ცდის მიუხედავად, პროდუქტი არ იყიდება, აქ უნდა ვიგულისხმოთ, რომ რაღაც დიდი პრობლემაა. ფასს, რეალურად, ქმნის გარემო, სერვისი, მომსახურება – ეს ყველაფერი შედის ფასის ხარისხში. სამწუხაროდ, ამ შემთხვევაში, ფასდაკლება არ არის გამოსავალი, რადგან გაყიდვების მენეჯერი ხშირად ვერ ხვდება იმას, რომ გაიაფება არ ნიშნავს გადაწყვეტილებას მიღებას.
მესამე შემთხვევაა, როდესაც განსაკუთრებულ თარიღთან გვაქვს საქმე. ფასდაკლება, როდესაც მართლა გინდა, წააახალისო საკუთარი მომხმარებელი, უნდა იყოს ნამდვილი.
და გვაქვს მეოთხე მოცემულობა – როდესაც კომპანია გადის ბაზრიდან. ხშირ შემთხვევაში, როდესაც კომპანია კონტროლდება ან გადის ბაზრიდან, მან უნდა გააკეთოს სოლიდური ფასდაკლება, რათა სრულად ამოყიდოს პროდუქცია”, – განმარტავს სოფო გოლეთიანი “თბილისი თაიმსთან” საუბრისას.
მასალა მოამზადა : მარიამ ტიელიძემ
