სხვა არაერთი ბიზნესის მსგავსად, „კეფერონეს“ იდეასაც საფუძვლად კოვიდპანდემიით გამოწვეული რეალობა დაედო. ამ საქმიანობის ისტორია საინტერესოა, პროდუქტი აშკარად გამორჩეულია, ხოლო გეგმები – მრავალფეროვანი. კონკრეტულად, რას სთავაზობს „კეფერონე“ მომხმარებლებს და რა სიახლეები ელით მათ – „თბილისი თაიმსს“ მანონი შავიშვილი ესაუბრა.
„კეფერონეს“ წარმოების იდეა პანდემიის პერიოდში დაიბადა. თავიდან ამას გართობის სახე ჰქონდა, შევეცადეთ – გამოთავისუფლებული დრო, რომლის დეფიციტსაც იმ ხანად არ განვიცდიდით, უფრო ქმედითი გაგვეხადა. გაგვიჩნდა იდეა, ჩვენი ოჯახის საყვარელი კერძი სხვებისთვისაც გაგვეცნო და დავიწყეთ პირველი შეკვეთების მიღება. შედეგმა მოლოდინს გადააჭარბა, რამაც განაპირობა იდეა – ოჯახურ საქმიანობად გვექცია: დავხვეწეთ მომზადების ტექნიკა, შევქმენით პროდუქციის სტანდარტი და მოვახდინეთ ბრენდირება, გავწერეთ სამომავლო გეგმა, რომელსაც ნელ-ნელა, ნაბიჯ-ნაბიჯ მივყვებით.
ჩვენ ჩვენივე დამზადებული კეფირისგან კრემყველს ვაწარმოებთ, რომელსაც ვკმაზავთ სხვადასხვა სანელებლით და ვინახავთ ცივი დაწურვის ზეითუნის ზეთში“.
რით არის თქვენი პროდუქტი გამორჩეული?
„კეფერონეს“ გამორჩეულს სწორედ რომ მისი გამორჩეულობა ხდის – ხარისხი, არომატი, ტექსტურა, ვიზუალი, თუნდაც სახელწოდება, – ყველაფერი ერთად და ცალ-ცალკე. „კეფერონე“ არის პრობიოტიკებით გაჯერებული, აბსოლუტურად ჯანსაღი პროდუქტი, რომელიც არ შეიცავს კონსერვანტებსა და დანამატებს. იგი სრულიად ახალი პროდუქტია, რომელიც ცდილობს, ღირსეული ადგილი დაიკავოს ქართულ ბაზარზე.
რამდენად ხშირად სთავაზობთ მომხმარებლებს სიახლეებს?
ზოგადად, ყველის წარმოება იმდენად ცოცხალი, საინტერესო და აზარტული პროცესია, მოდუნების საშუალება არ გეძლევა, ამიტომაც, შეიძლება ითქვას, მუდმივად ახლის ძიებაში ვართ. ვცდილობთ, კრემყველის წარმოების პროცესის დახვეწის პარალელურად, სხვა სიახლეებზეც ვიფიქროთ. სულ ცოტა ხნის წინ დავიწყეთ კეფირის ყველის გამოშრობა და დაძველება, რომელსაც ღვინოში ვავარგებთ და სანელებლებში ვინახავთ, ასევე, ჩვენივე ტექნოლოგიით ვამზადებთ ყველის მარინადს.
ამ ეტაპზე, რამე სიახლეს ან პროდუქციის დამატებას თუ გეგმავთ?
დღეის მდგომარეობით, გვაქვს კეფირის ყველის ოჯახური წარმოება და ჩვენი უპირველესი მიზანი, ცხადია, საწარმოს შექმნაა. მიზნის მისაღწევად ვცდილობთ, ყველა შესაძლებლობა და რესურსი გამოიყენოთ, რაც შეეხება პროდუქციის დამატებას, ვფიქრობ – მალე გაგახარებთ.
