„საარსებო მინიმუმი დასცილდა სიღარიბის ზღვრის ცნებას. ეს, ფაქტობრივად, ორი განსხვავებული ეკონომიკური ინდიკატორია. პირობითაც, თუ საარსებო მინიმუმი არის 240 ლარი, ეს არ ნიშნავს, რომ ვისაც 241 ან 242 ლარი აქვს, ის აღარ მიეკუთვნება ღარიბთა კატეგორიას. ამიტომ, ჩვენ უნდა შევძლოთ ახალ პარადიგმაზე, ახალ სისტემაზე გადასვლა, რომელშიც უფრო ობიექტურად იქნება ასახული რეალობა, ფასთა ცვლილება და ა.შ. ეს, რა თქმა უნდა, გამოიწვევს საარსებო მინიმუმის არსებით ზრდას. ის მაქსიმალურად მიუახლოვდება სიღარიბის ზღვრის ცნებას“, – ამის შესახებ ეკონომიკის ექსპერტმა, იოსებ არჩვაძემ „თბილისი თაიმსთან“ საუბრისას განაცხადა.
„მაგალითად, ამერიკის შეერთებულ შტატებთან შედარებით, ფასების დონე საქართველოში, ოფიციალური სტატისტიკით, სადღაც 40-45 %-ის დონეზეა, მაგრამ იქ საშუალო ოჯახის წლიური საარსებო მინიმუმი 24 500 დოლარამდეა. ეს რო გადავიანგარიშოთ, ჩვენთან ერთ ოჯახზე გამოდის 2 000 დოლარზე მეტი. ეს რომ ლარებში გადავიანგარიშოთ, ავდივართ საკმაოდ მაღალ მაჩვენებელზე.
ამ მონაცემებით ჩვენ მხოლოდ შეგვიძლია, გარკვეული ილუზიური ეფექტი შევქმნათ სიღარიბესთან მიმართებით. ამიტომ, მიზანშეწონილი იქნებოდა, გადასინჯულიყო საარსებო მინიმუმი მისი ერთჯერადად გაზრდის თვალსაზრისით“, – განაცხადა იოსებ არჩვაძემ.
