ჩვეულებრივ, სხვადასხვა პროექტისა თუ კონკურსის მეშვეობით, საზოგადოებას ეძლევა შესაძლებლობა, გაიცნოს საინტერესო, გამორჩეული, ნიჭიერი ადამიანები. ჩვენს ქვეყანაში მიმდინარე პროექტებს შორის, „მასტერშეფი“ განსაკუთრებული პოპულარობით სარგებლობს. სეზონიდან სეზონამდე, ჩვენ საკუთარ რჩეულებს ვგულშემატკივრობთ და თვალ-ყურს ვადევნებთ მათ წინსვლას.
გიგი აფციაური ერთერთია მათ შორის, ვისაც მაყურებელი საკუთარი ექსპერიმენტებისა და პროგრესის გამო გულშემატკივრობდა. ის „თბილისი თაიმსს“ ესაუბრა, როგორ მიიღო პროექტში მონაწილეობის მიღების გადაწყვეტილება და, გარდა კულინარიისა, რა ინტერესები აქვს.
„სამზარეულოში ჩემი მოღვაწეობა დაიწყო 2017 წელს, სრულიად შემთხვევით და მალევე მივხვდი, რომ ეს იყო ის საქმე, რაც მიზიდავდა. ამ მხრივ, თვითნასწავლი ვარ. არ დამიმთავრებია არანაირი კურსი. ერთადერთი – საკონდიტროს განზრით მაქვს 1-თვიანი მასტერკლასები გავლილი. დანარჩენი – ჩემით.
„მასტერშეფშიც“ ასე, შემთხვევით გამოვჩნდი, დედაჩემის და ჩემი მეგობრების რამდენიმეწლიანი თხოვნის შემდეგ. სირთულეებს რაც შეეხება – კამერები თავიდან ძალიან მაბნევდა. შემდეგ უკვე მე და კამერები დავმეგობრით.
გიგი საუბრობს, თუ რით არის დაკავებული ყოველდღიუდად და რა გეგმები აქვს სამომავლოდ.
„ამ ეტაპზე, ძირითადად, ვაწყობ მენიუებს და ობიექტების გახსნაში ვიღებ მონაწილეობას. ახლაც ჩართული ვარ ერთერთი ობიექტის მენიუზე, რომელსაც ვამთავრებ და 4 თვეში პარიზში გადავდივარ სამუშაოდ- საცხოვრებლად. რამდენიმე წელიწადში ჩამოვალ და უკვე ჩემი ობიექტის მენიუს დავდებ.
სამზარეულოს გარდა, დაკავებული ვარ მიუსაფარი ძაღლების შეფარებასა და შემდეგ ახალი პატრონის ძიებაში. საფრანგეთიდან რომ ჩამოვალ, რესტორანი და ძაღლების თავშესაფარი უნდა გავაკეთო თბილისში. მეტი გეგმა, ჯერჯერობით, არ მაქვს“.
