წარმატებას ყოველთვის განსაზღვავს შრომა და მონდომება. შესაძლოა, თავდაპირველი წარუმატებლობა დიდ მიღწევებში გადაიზარდოს, თუკი ჩვენ ყოველდღიურად ვიზრუნებთ საკუთარი უნარების განვითარებაზე. ლუკა თოდუა პროექტ “მასტერშეფის” გამორჩეულად ძლიერი მონაწილეა. საკუთარი ცოდნისა და მცდელობების გათვალისწინებით, მან შეძლო და, მისთვის არცთუ სასიამოვნო პირველი სეზონის შემდგომ, პროექტის კიდევ ორ შეჯიბრს ძალიან ძლიერი კონკურსანტის სტატუსით შეუერთდა. შედეგად, მან ორიდან ორ შემთხვევაში ფინალისტის სტატუსი მოიპოვა. ლუკა “თბილისი თაიმსს” საკუთარ განვლილ გზაზე ესაუბრა.
ყველაფერი დაიწყო 2014 წელს. ამ დროს ვიყავი 14 წლის და აღმოვჩნდი ერთერთი სახინკლის სამზარეულოში. იქ ვეხმარებოდი. დაახლოებით, ერთ წელიწადში, ჩავაბარე პროფესიულ სასწავლებელში, კულინარიულ ფაკულტეტზე. 18 წლამდე ვმუშაობდი სხვადასხვა ადგილას. უკვე ამ ასაკში მოვხვდი ძალიან კარგ ბრენდში, “ლადურე” და აქედან დაიწყო ჩემი კარიერული წინსვლა. ამის შემდგომ იყო არაერთი საინტერესო პროექტი. დავიწყე უცხოელებთან მუშაობა და, შეიძლება ითქვას, საბოლოოდ ამოვისუნთქე. ვიყავი იტალიაში, დიდ ბრიტანეთში – უფროსი შეფი და გავძლიერდი კულინარიის მხრივ.
ამბობს ლუკა და ხაზს უსვამს, თუ რა შეიცვალა მის ცხოვრებაში პროექტში მონაწილეობის შემდგომ და რა შეთავაზებები მიიღო მსოფლიო მასშტაბით.
მეოთხე სეზონი ჩემთვის აღმოჩნდა საბედისწერო – წარუმატებელი პირველი სეზონის შემდგომ, მეოთხე სეზონზე უკვე, შეიძლება ითქვას, ყველა ავალაპარაკე. ბოლო სეზონი იყო ძლიერების და მეც დავბრუნდი, როგორც ძლიერი მონაწილე. ფინალის შემდეგ, გამოჩნდა ძალიან საინტერესო შემოთავაზებები – აქედან მხოლოდ ერთი-ორი იყო საქართველოდან, ასევე, ბელგიიდან, რუსეთიდან, დიდი ბრიტანეთიდან… საბოლოოდ, არჩევანი დიდ ბრიტანეთზე შევაჩერე, მოლაპარაკებებიც მქონდა და ყველაფერი არის კარგად. დაახლოებით, წელიწად-ნახევარია, რაც საქართველოში აღარ ვმუშაობ.
როგორც ლუკა თოდუა აღნიშნავს, სოციალურ ქსელებში საკმაოდ აქტიურია. გარდა ამისა, ის საკუთარი თავი წინსვლასა და განვითარებაზე მუდმივად ზრუნავს.
სოც. მედიაში ვარ საკმაოდ აქტიური. “ტიკ-ტოკზე” მყავს 60 000-ზე მეტი გამომწერი, “ინსტაგრამზე” – 23 000. გარდა ამისა, ვვარჯიშობ, სპორტის დონეზე – მიყვარს ჩხუბი. ვაკეთებ ისეთ რაღაცებს, რაც მსიამოვნებს და ვზრუნავ საკუთარი თავის განვითარებაზე.
