სოციალურად დაუცველები თბილისის მიკროავტობუსებში 50%-იანი ფასდაკლებით დღის განმავლობაში მხოლოდ 4-ჯერ იმგზავრებენ, – ამის შესახებ ჟურნალისტებს დღეს კომპანია “თბილისის მიკროავტობუსის” ოფისში კომპანიის ხელმძღვანელმა დავით ასანიძემ განუცხადა.
დავით ასანიძემ განცხადება გააკეთა სოციალურად დაუცველი მოსახლეობის შეღავათებთან დაკავშირებით. მან აღნიშნა, რომ 70 000-ზე დაბალი ქულის მქონე სოციალურად დაუცველი პირები ისარგებლებენ 50%-იანი ფასდაკლებით.
ამასთან, სოციალურად დაუცველები დღის განმავლობაში ისარგებლებენ მხოლოდ 4-ჯერ, შემდეგ, მეხუთე გავლაზე შეღავათი აღარ ექნებათ.
კერძოდ, პირველი მგზავრობისას პირველი გადასახადი იქნება 40 თეთრი, დანარჩენი 40 თეთრი კი მერიის ბიუჯეტიდან დაფინანსდება. მეორე გავლაზე, სოციალურად დაუცველი ასევე ისარგებლებს ფასდაკლებით და 65 თეთრის ნაცვლად დაფარავს 32 თეთრს და ასე იქნება შემდგომი მესამე და მეოთხე მგზავრობის შემთხვევაში.
დავით ასანიძემ ეს ლიმიტირებული შეღავათი იმით ახსნა, რომ სოციალურად დაუცველებისთვის მგზავრობაზე ფასდაკლება ადრეც არსებობდა და დაფიქსირდა შემთხვევები, რომ ერთი ბარათიდან დღის განმავლობაში 20-30 გავლა იყო აღრიცხული.
ასანიძემ ამასთან ასევე განაცხადა, რომ სოციალურად დაუცველებს მერია სპეციალურ ბარათებს დაურიგებს. ისინი ჩარიცხავენ გარკვეულ თანხას ბარათზე და ფასდაკლებით სამარშრუტო ტაქსებში იმგზავრებენ.
სოციალურად დაუცველებისათვის 50%-იანი შეღავათის შესახებ დედაქალაქის საკრებულომ გადაწყვეტილება 20 ნოემბრის სხდომაზე მიიღო. ამ მიზნით თბილისის ბიუჯეტში ცვლილებაც შევიდა და 300 000 ლარი გამოიყო.
27.11.13