ალეკო ელისაშვილის განცხადებით, პარლამენტში მომხდარი ფიზიკური დაპირისპირების შემდეგ, მის სახლთან ნიღბიანი პირები მივიდნენ და ტერიტორიის მოხატვა დაიწყეს:
“არც ძველი ბიჭი ვყოფილვარ არასდროს და არც ხულიგანი. ამომასხა, თვალებში ვუყურებდი ფილიპე მახარაძეებს, სერგო ორჯონიკიძეებს, მიხა ცხაკაიებს, რომლებიც ასე უტიფრად, დემაგოგიურად მიგვათრევენ რუსეთში და როცა არგუმენტს ეუბნები უტიფრობას გვპასუხობენ.
ეგრევე სახლში მოვარდნენ, ნიღბებით, 3-4 ვიღაცა ბავშვი იყო. ძალიან ცუდი, რომ ასეთ ასაკში ასეთ რამეს ასრულებენ. დაიწყეს მოხატავა და რეაქციაც კი ვერ მოვასწარი, მეზობლებმა კინწისკვრით გაყარეს. ველოდები ყველაფერს, ყველაფერზე წამსვლელები არიან, მაგრამ არ მეშინია. გიჟი არა ვარ. ახლა არის არჩევანი – საქართველო იქნება თავისუფალი ქვეყანა, თუ შეგვათრევენ რუსეთში. ამას როგორც შემეძლო წინ აღვუდექი და როგორც შემეძლება წინ აღვუდგები.” თქვა ელისაშვილმა “მთავარი არხის” პირდაპირ ეთერში.
პარლამენტის იურიდიულ საკითხთა კომიტეტის სხდომაზე „უცხოური გავლენის გამჭვირვალობის შესახებ“ კანონპროექტის განხილვა დილიდან მიმდინარეობს. დეპუტატებს კანონპროექტის დეტალები „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ გააცნო. კითხვებზე პასუხის გაცემის პროცესში კანონპროექტის განხილვა ფიზიკურ დაპირისპირებაში გადაიზარდა.
