საკალათბურთო კლუბი „ქარი • B.C. Qari“, რომელშიც წყნეთში ტრაგიკულად დაღუპული დათუნა ჟღენტი თამაშობდა, მოზარდის გარდაცვალებას ეხმაურება და სოციალურ ქსელში წერს:
„სამუდამოდ ჩვენს გულებში იქნები დათუნა, იმ ქვეყნად ერთად ვითამაშებთ კალათბურთს და ერთად გავიმარჯვებთ“. – წერს კლუბი.
შეგახსენებთ, რომ წყნეთში დენის დარტყმის შედეგად, 15 წლის მოზარდი, დათუნა ჟღენტი დაიღუპა. გავრცელებული ინფორმაციით, ბიჭი სტუმრად იმყოფებოდა.
უბედური შემთხვევა სკვერში მოზარდების თამაშის დროს მოხდა. გავრცელებული ინფორმაციით, სკვერის მიმდებარედ ინფრასტრუქტურული სამუშაოები მიმდინარეობდა.
როგორც ერთ-ერთმა თვითმხილველმა მედიასთან საუბრისას აღნიშნა, ადგილობრივები ცდილობდნენ მოზარდს სასწრაფოს მისვლამდე დახმარებოდნენ, თუმცა უშედეგოდ. ბიჭი ექიმების მისვლამდე დაიღუპა.
შემთხვევის ადგილზე მთელი ღამის განმავლობაში მუშაობდნენ ექსპერტ-კრიმინალისტები. როგორც „ფორტუნას“ შინაგან საქმეთა სამინისტროში განუცხადეს, გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოებისას უსაფრთხოების წესის დარღვევას გულისხმობს.
