კახეთში, სოფელ კაბალიდან 23 წლის ქალი გაიტაცეს. შემთხვევა გუშინ მოხდა.
ახალგაზრდა ქალის ბიძა ამბობს, რომ გამტაცებლემბა ძალა გამოიყენეს. არსებობს გატაცების ამსახველი ვიდეოკადრებიც, რომელიც ბიძის ნათქვამს ადასტურებს.
„ოთხნი იყვნენ, მოცვივდნენ და გოგო მანქანაში ჩატენეს. გოგოც და მისი ბებიაც წინააღმდეგობას უწევდნენ, თუმცა ვერაფერს გახდნენ. გოგომაც და ბებიამაც სხეულის დაზიანებები მიიღეს. ვიცით იმ მანქანის მოდელი და ნომერი, რომლითაც გაიტაცეს.
ცნობილია ავტომობილის სავარაუდო სამყოფელი. გამოკითხვაზე ვართ პოლიციაში“, – ამბობს გატაცებული ქალის ბიძა.
“არ ვიცი, სად არის ჩემი შვილი, გოგო მანქანაში ჩატენეს, ბებიას ურტყეს. ადგილობრივებმა არაფერი იციან. მთელი ღამე ვიკითხებოდით“, – აცხადებს გატაცებულის მამა.
შინაგან საქმეთა სამინისტროს ინფორმაციით, გატაცებული ქალის ძებნაში პოლიციაა ჩართული. საქმე აღძრულია სისხლის სამართლის კოდექსის 143-ე მუხლით – თავისუფლების უკანონო აღკვეთისთვის გამტაცებლებს რვიდან თორმეტ წლამდე პატიმრობა ემუქრებათ.
