საქართველოს ჯანდაცვის მინისტრმა დავით სერგეენკომ საყოველთაო ჯანდაცვის პროგრამის ერთი წლის ანგარიში წარადგინა. ამასთან დაკავშირებით დავით სერგეენკომ დღეს პრესკონფერენცია გამართა.
მისი თქმით, საყოველთაო ჯანდაცვის პროგრამა 2013 წლის 28 თებერვლიდან ამოქმედდა. 2013 წლის 1 ივლისამდე ფინანსდებოდა სამედიცინო მომსახურების 3 ბლოკი, ხოლო მეორე ეტაპიდან პროგრამამ სამედიცინო სერვისების 6 ბლოკი მოიცვა. მათ შორის პირველადი ჯანდაცვის გაფართოებული მომსახურება, გადაუდებელი ამბულატორიული დახმარება, გაფართოებული გადაუდებელი სტაციონარული მომსახურება, გეგმურ-ქირურგიული ოპერაციები, ონკოლოგიური დაავადებების მკურნალობა და მშობიარობა.
მინისტრის ინფორმაციით, 2013 წლის 28 თებერვლიდან 2014 წლის 31 იანვრის ჩათვლით, საყოველთაო ჯანდაცვის პროგრამის ფარგლებში დაფიქსირდა 196 859 ურგენტული შემთხვევა, მათ შორის სტაციონარული 47 434.
ამავე პერიოდში ჩატარდა 13 549 გეგმური ქირურგიული ოპერაცია. აქედან, კარდიოქირურგია 609, ონკოლოგიური ოპერაცია 967. ქიმიო, ჰორმონო და სხივური თერაპია – 5687. მინისტრის თქმით, აღნიშნულ პერიოდში იმშობიარა 21 017 ქალმა, აქედან ფიზიოლოგიური იყო – 13 924, ხოლო საკეისრო კვეთა 7 093.
28.02.14
