გერმანიის ფედერაციულ რესპუბლიკაში საქართველოს ელჩმა ლადო ჭანტურიამ ბუნდესტაგის წევრი, ქრისტიან-დემოკრატიული პარტიის წარმომადგენელი თომას ფეისტი (Dr. Thomas Feist) მიიღო. შეხვედრაზე საუბარი შეეხო საქართველოსა და გერმანიას შორის პროფესიული განათლების სფეროში სამომავლო თანამშრომლობის საკითხებს.
ბატონმა ფეისტმა აღნიშნა, რომ იგი უახლოეს მომავალში აპირებს ევროპის პარლამენტში წარადგინოს კანონპროექტი დუალური პროფესიული განათლების შესახებ. შესაბამისი მხარდაჭერის მოპოვების შემდეგ კი, მისი სურვილია განხორციელდეს ორმხრივი პროექტები სხვადასხვა ქვეყნებთან. ბუნდესტაგის წევრი დაინტერესდა საქართველოსთან აღნიშნულ სფეროში შესაძლო თანამშრომლობის საკითხებით. დუალური პროფესიული განათლების გერმანული მოდელის მიხედვით, პროფესიული მომზადება ხდება პრაქტიკული საქმიანობის პარალელურად და ორიენტირებულია უმაღლესი კვალიფიკაციის სპეციალისტების მომზადებაზე.
შეხვედრის დასასრულს, საქართველოს ელჩი ლადო ჭანტურია მიესალმა თომას ფეისტის ინიციატივას და აღნიშნა, რომ პროექტის განხორციელების მიზნით ამ სფეროში გერმანულ მხარესთან თანამშრომლობის საკითხს საქართველოს შესაბამის უწყებებთან განიხილავს.
17.03.14
