საყდრისთან დაკავშირებით კულტურული მემკვიდრეობის დაცვის სააგენტო უახლოეს დღეებში კომპანია RMG Gold-თან მემორანდუმს გააფორმებს. ამის შესახებ ჟურნალისტებს კულტურის მინისტრის მოვალეობის შემსრულებელმა ალექსანდრე მარგიშვილმა განუცხადა.
საყდრისის საკითხთან დაკავშირებით სამინისტროში დიპლომატიური კორპუსის წარმომადგენლებთან შეხვედრა დასრულდა.
მინისტრის მოვალეობის შემსრულებელმა ალექსანდრე მარგიშვილმა დიპკორპუსის წარმომადგენლებს სამინისტროს ბოლო გადაწყვეტილება გააცნო. კერძოდ, სამინისტრომ მიიღო გადაწყვეტილება კომპანია “RMG Gold”-მა საყდრისი-ყაჩაღიანის ტერიტორიაზე აწარმოოს მოპოვებითი სამუშაოები, მას შემდეგ რაც იქ საერთაშორისო ექსპერტთა ჯგუფი მონიტორინგს განახორციელებს.
“ეს გადაწყვეტილება გულისხმობს, რომ რაიმე ახალი გარემოებების აღმოჩენის შემთხვევაში, მოპოვებითი სამუშაოები დაუყოვნებლივ შეჩერდება და აღმოჩენების კვლევა დაიწყება. ჩვენ შევთავაზეთ პარტნიორებს, რომ სამომავლოდ უფრო ადრე ჩავაყენოთ საქმის კურსში იმ პროცესების შესახებ, რაც მათ აინტერესებთ. შესაძლებელია საყდრისი-ყაჩაღიანთან დაკავშირებით მოპოვებით სამუშაოებზე დაკვირვების კუთხით ერთობლივი სამუშაო ჯგუფი შევქმნათ, რომელიც მიიღებს გადაწყვეტილებებს, რომელი ექსპერტებით დაკომპლექტდება მონიტორინგის ჯგუფი, როგორ შეირჩეს ეს ექსპერტები და რა უფლებამოსილება მიენიჭებათ მათ”, – აღნიშნა ალექსანდრე მარგიშვილმა.
მინისტრის მოვალეობის შემსრულებლის თქმით, რაც შეეხება გერმანიის მხარის მიერ დასახელებულ ხუთი ინსტიტუტის ექსპერტს, ამაზე საუბარი ჯერ ნაადრევია. მისივე განცხადებით, პირველ რიგში, დიპლომატების მიერ შეთავაზებულ ექსპერტებს განიხილავენ და შემდეგ მათთან კონსულტაციების შედეგად მიიღებენ გადაწყვეტილებას, რომელი ექსპერტები ჩაერთვებიან მონიტორინგის ჯგუფში.
“ის, რომ მონიტორინგი ჩატარდება, გადაწყვეტილია. მაგრამ ვინ ჩაატარებს, ჯერჯერობით დაზუსტებული არ არის. უახლოეს დღეებში იგეგმება მემორანდუმის გაფორმება სააგენტოსა და კომპანია RMG Gold-ს შორის, რომელსაც ტერიტორიაზე მოპოვებითი სამუშაოების ლიცენზია გააჩნია”, – აღნიშნა მარგიშვილმა.
მინისტრის მოვალეობის შემსრულებელმა ამ ეტაპზე თავი შეიკავა მემორანდუმის დეტალებზე საუბრისგან. ასევე მარგიშვილმა დასძინა, რომ არასამთავრობო ორგანიზაციების მოთხოვნის შესაბამისად, გასაჯაროვდება სამინისტროს ბოლო დოკუმენტი, რომლის თანახმადაც RMG Gold-ს სამუშაოების გაგრძელების უფლება მიეცა.
დღეს რამდენიმე არასამთავრობო ორგანიზაციამ საყდრისი-ყაჩაღიანი ისტორიულ საბადოსთან დაკავშირებით პრესკონფერენცია გამართა. მათ განაცხადეს, რომ საყდრისი-ყაჩაღიანის არქეოლოგიური მემკვიდრეობის მნიშვნელობის მიუკერძოებელი შეფასების მიზნით, დაუყოვნებლივ უნდა შესრულდეს საქართველოს კულტურის მინისტრის მიერ გერმანიის მხარისთვის მიცემული დაპირება საერთაშორისო ექსპერტების მოწვევის თაობაზე, მადრიდის, ტულუზის, ინსბრუკის, კორკის და სოფიას უნივერისტეტებიდან. მათივე თქმით, ამ ნუსხას უნდა დაემატოს აშშ-ის მიერ შემოთავაზებული სამთო-არქეოლოგიის სპეციალისტი.
19.03.14
