ჟენევაში საერთაშორისო დისკუსიების მორიგი – 27-ე რაუნდი გაიმართა. შერიგებისა და სამოქალაქო თანასწორობის საკითხებში სახელმწიფო მინისტრის ცნობით, ქართულმა მხარემ შეხვედრაზე მოსახლეობის ჰუმანიტარული პრობლემების საკითხები მწვავედ დააყენა.
ჰუმანიტარულ საკითხებზე მომუშავე ჯგუფის ხელმძღვანელის, შერიგებისა და სამოქალაქო თანასწორობის საკითხებში სახელმწიფო მინისტრის პირველი მოადგილის ქეთევან ციხელაშვილის განცხადებით, სამუშაო შეხვედრაზე ქართულმა მხარემ ყურადღება გაამახვილა გამყოფ ხაზზე მავთულხლართების გავლებიასა და მოსახლეობისთვის ამ პროცესის მძიმე ჰუმანიტარულ შედეგებზე, მათ შორის გადაადგილების თავისუფლების შეზღუდვაზე, ახალგორის მოსახლეობისთვის ახალი რეგულაციების შესაძლო დაწესებაზე.
“ასევე მწვავედ დავაყენეთ გალის რაიონიდან ზუგდიდის მიმართულებით მოსწავლეების, სასწრაფო სამედიცინო დახმარების მანქანების გამოტარების საკითხები. ამ საკითხებზე აფხაზური მხარიდან მივიღეთ პირობა, რომ ოპტიმალურ გამოსავალს გამონახავენ, რათა მოსწავლეებს განათლების და ავადმყოფებს სასწარფო სამედიცინო დახმარების მიღებაში არ შეეშალოთ ხელი. ასევე, მივიღეთ პირობა, რომ გამოინახება გამოსავალი კულტურული მემკვიდრეობის ძეგლების საკითხის მოსაგვარებლად. შესაძლოა, შეიქმნას კომისია, რომელშიც ქართველი, აფხაზი და საერთაშორისო ექსპერტები იქნებიან ჩართული”, – განაცხადა ქეთევან ციხელაშვილმა.
მისივე განცხადებით, ჰუმანიტარულ საკითხებზე მომუშავე ჯგუფში ქართულმა მხარე, ასევე მწვავედ დააყენა დევნილების დაბრუნების საკითხი.
“ამ საკითხზე განსაკუთრებული აქცენტი გავაკეთეთ და განვაცხადეთ, რომ მომდევნო რაუნდზე კიდევ მწვავედ დავაყენებთ ამ პრობლემას. დევნილების დაბრუნება არის სწორედ ერთ-ერთი მთავარი თემა”, _ განაცხადა ქეთევან ციხელაშვილმა.
სამოქალაქო თანასწორობის საკითხებში სახელმწიფო აპარატის განცხადებით, ჟენევის საერთაშორისო დისკუსიების მომდევნო რაუნდი 16-17 ივნისისთვის დაიგეგმა.
27.03.14
