საქართველოს ყოფილი პრეზიდენტი მიხეილ სააკაშვილი დისტანციურ დაკითხვაზე უარს აცხადებს, – ამის შესახებ ინფორმაციას ტელეკომპანია “რუსთავი 2” ავრცელებს.
მიხეილ სააკაშვილმა საქართველოს მთავარი პროკურატურის შეთავაზებასთან დაკავშირებით კომენტარი კიევში, უკრაინის ყოფილ პრემიერ-მინისტრ იულია ტიმოშენკოსთან შეხვედრის შემდეგ გააკეთა.
“შეეშინდათ საერთაშორისო დაწოლის, როგორც ჩანს და ახლა რაღაც შეცვალეს ფორმები, რადგან კარგად აუხსნეს ევროპელებმა და ამერიკელებმა, მაგრამ თავგასულ რუს ოლიგარქებს… უკრაინიდან მაინც აიღონ მაგალითი, ამ ქალბატონის, ტიმოშენკოს მაგალითზე რითი მთავრდება ასეთი სახის კამპანიები და პროკურატურის ასე გამოყენება… ცუდად მთავრდება, ცუდად ჩემი რჩევაა. მით უმეტეს, პროკურატურის მხრიდან, რომელსაც მართავს კაცის კაცი ფარცხალაძე, რომელიც ჩვეულებრივი ყაჩაღია და მთავრობის მხრიდან, რომელსაც მართავს კაცის კაცი. კაცის კაცი რა უნდა იყოს?! რეალურად, მართავს სხვა და სხვას ჰქვია მთავრობის თავმჯდომარე. ასე რომ ამ პროცესს არ აქვს არანაირი ლეგიტიმურობა, მე კიდევ მაქვს ძალიან ბევრი საქმე იმისათვის, რომ სისულეებზე არ ვხარჯო დრო”, – განაცხადა მიხეილ სააკაშვილმა.
საქართველოს ყოფილი პრეზიდენტის კომენტარს ტელეკომპანია “რუსთავი 2″ ავრცელებს. აღნიშნული განცხადების გაკეთების დროს მიხეილ სააკაშვილის გვერდით, უკრაინის ყოფილი პრემიერი იულია ტიმოშენკო იმყოფებოდა.
მთავარი პროკურატურა ყოფილ პრეზიდენტ მიხეილ სააკაშვილს ტექნიკური საშუალებების გამოყენებით, დისტანციურად დაკითხვას სთავაზობს.
აღნიშნულთან დაკავშირებით უწყებამ დღეს სპეციალური განცხადება გაავრცელა. პროკურატურა მიხეილ სააკაშვილს დისტანციურ დაკითხვაზე საკუთარი პოზიციის დასაფიქსირებლად ერთკვირიან ვადას აძლევს.
მთავარი პროკურატურა იმედს გამოთქვამს, რომ ყოფილი პრეზიდენტი მიხეილ სააკაშვილი თავადაც სათანადოდ მოეპყრობა საკუთარ სტატუსს, იმოქმედებს როგორც კანონმორჩილი მოქალაქე და გამოძიებასთან მოწმის სახით თანამშრომლობით ხელს შეუწყობს დანაშაულის გახსნას და დამნაშავეთა დასჯას, ვინც არ უნდა იყვნენ ისინი”, – ნათქვამია უწყების განცხადებაში.
28.03.14
