შინაგან საქმეთა მინისტრის, ალექსანდრე ჭიკაიძის განცხადებით, წლების წინ საზოგადოებას ჰქონდა აზრი, რომ პრეზიდენტი სააკაშვილი თავს კანონზე მაღლა აყენებდა და დაკითხვაზე გამოუცხადებლობამ ეს დაადასტურა.
ამის შესახებ ალექსანდრე ჭიკაიძემ ჟურნალისტებს მთავრობის დღევანდელი სხდომის დაწყებამდე განუცხადა.
“ეს არის ჩემი სუბიექტური აზრი – გარკვეული წლების წინ საზოგადოებას ჰქონდა აზრი, რომ პრეზიდენტს თავი კანონზე წინ ეყენა და ამ შემთხვევაში ეს დაადასტურა, რომ თავს თვლის კანონზე უზენაესად”, – განაცხადა ჭიკაიძემ.
რაც შეეხება დისტანციური დაკითხვის მეთოდს, შინაგან საქმეთა მინისტრი აცხადებს, რომ ამ საკითხში კარგად გაცნობიერებული არ არის, მაგრამ მიიჩნევს, რომ თუ არის საზოგადოების მაღალი ინტერესი, პროკურატურამ ნებისმიერი საშუალებით უნდა მიიღოს ჩვენება.
კითხვაზე, ასოცირების ხელშეკრულების გაფორმების წინ, ყოფილი პრეზიდენტის დაბარება დაკითხვაზე ქმნის თუ არა გარკვეულ საფრთხეებს და კითხვის ნიშნებს, ალექსანდრე ჭიკაიძე პასუხობს, რომ “ხან არჩევნები იქნება, ხან რაღაც სხვა სიახლეები ჩვენს ქვეყანაში და აქედან გამომდინარე, პროკურატურამ რომ ფუნქციონირება შეწყვიტოს, მართებული არ იქნება”. ამასთან, შინაგან საქმეთა მინისტრი ვერ აკონკრეტებს, რა იქნება შემდგომი ნაბიჯები და დაიწყება თუ არა მიხეილ სააკაშვილის სამართლებრივი დევნა.
28.03.14
