საქართველოს პრეზიდენტის, გიორგი მარგველაშვილის გადაწყვეტილებით, ზვიად გამსახურდიას სახელობის სტიპენდია დაწესდება. ამის შესახებ ნათქვამია პრეზიდენტის განცხადებაში, რომლითაც მარგველაშვილმა საზოგადოებას რეფერენდუმისა და ზვიად გამსახურდიას დაბადების დღე მიულოცა.
“დღეს ჩვენი ქვეყნის უახლოესი ისტორიის უმნიშვნელოვანესი თარიღი აღინიშნება. 1991 წლის 31 მარტს საქართველოს პირველი პრეზიდენტის ზვიად გამსახურდიას თაოსნობით ჩატარებულმა რეფერენდუმმა მთელი მსოფლიოსათვის თვალსაჩინო გახადა ქართველი ხალხის ურყევი ნება საქართველოს სახელმწიფოებრიობის აღდგენის შესახებ. დიახ, საქართველოს დამოუკიდებლობა ჩვენს ხალხში დიდი ხნის მომწიფებული, თაობათა მიერ ნალოლიავები ნების გამოხატვა იყო. რეფერენდუმი იქცა ქვეყნის ისტორიის ერთ-ერთ უმნიშვნელოვანეს მოვლენად, შეიძლება ითქვას, ზნეობრივ აქტად, რომელმაც ჩვენს შემდგომ განვითარებას დაუდო სათავე, ვინაიდან, როგორც თავად ზვიად გამსახურდია იტყოდა, “დამოუკიდებლობა ხომ ერის ზნეობის გადარჩენაა და, ამდენად, თვით ერის გადარჩენაც”. ამ დღეს ჩვენ მკაფიოდ და ცალსახად განვაცხადეთ, რომ მიზნად ვისახავთ გავხდეთ თანამედროვე განვითარებული სამყაროს სრულფასოვანი და ღირსეული წევრი, მსოფლიო ერთა თანამეგობრობაში დავიმკვიდროთ ის ადგილი, რომელიც ერთ-ერთი უძველესი და უნიკალური კულტურის ერს სამართლიანად გვეკუთვნის. გზა, რომელიც მას შემდეგ გავიარეთ, ურთულესი აღმოჩნდა. ჩვენ გვქონდა წარმატებებიც და შეცდომებიც, ჩვენი ტერიტორიის ნაწილი კვლავაც ოკუპირებულია და ასობით ათასი დევნილი კვლავაც ელოდება საკუთარ სახლში დაბრუნებას. მაგრამ საქართველოს მოსახლეობას არასდროს დაუყენებია საკუთარი არჩევანი კითხვის ნიშნის ქვეშ. დღეს საქართველო მტკიცედ დგას დამოუკიდებლობის განმტკიცების, მდგრადი განვითარების, ევროპულ და ევროატლანტიკურ ოჯახში ინტეგრაციის გზაზე. და ამ პროცესში, ყველაზე რთულ მომენტებშიც კი, ჩვენ ძალას გვმატებს ის სულისკვეთება, რომელიც 1991 წლის 31 მარტს ქართველი ხალხის ნების გამოხატვისას სუფევდა”, – ნათქვამია პრეზიდენტის განცხადებაში.
გიორგი მარგველაშვილი ამ ისტორიულ მოვლენებში ზვიად გამსახურდიას როლი ამმხრივ სრულიად განსაკუთრებულია და თითოეულ მოქალაქეს ულოცავს საქართველოს პირველი პრეზიდენტის დაბადების დღეს.
“მე მივიღე გადაწყვეტილება, რომ პირველი პრეზიდენტის ხსოვნის უკვდავსაყოფად დავაარსო ზვიად გამსახურდიას სახელობის სტიპენდია, რომელიც ივანე ჯავახიშვილის სახელობის სახელმწიფო უნივერსიტეტის ფილოლოგიის ფაკულტეტის სასწავლო წლის საუკეთესო სტუდენტს გადაეცემა. ამ ფაკულტეტზე სამეცნიერო-პედაგოგიურ მუშაობას ზვიად გამსახურდიამ თავისი ცხოვრების მნიშვნელოვანი წლები მიუძღვნა. მჯერა, რომ მისი მაგალითი, მისი ღვაწლის დაფასება, მნიშვნელოვანი სტიმული იქნება ჩვენი ახალგაზრდობისთვის, მათთვის, ვინც ხვალ უნდა იტვირთოს საქართველოში მეცნიერების, ქვეყნის განვითარების, დამოუკიდებლობის განმტკიცების პასუხისმგებლობა. ღმერთი ფარავდეს საქართველოს!”, – ნათქვმია საქართველოს პრეზიდენტის განცხადებაში.
31.03.14
