საქართველოს საგარეო საქმეთა მინისტრმა, მაია ფანჯიკიძემ “TV 3”- ის ჟურნალისტებს გათავისუფლება მიულოცა. როგორც მაია ფანჯიკიძემ ჟურნალისტებს განუცხადა, საგარეო საქმეთა სამინისტრომ ბევრი იმუშავა იმისთვის, რომ ეს დაკავების ფაქტი მისულიყო ყველას ყურამდე, ვისაც შეეძლო გარკვეული წვლილი შეეტანა ჟურნალისტების გათავისუფლების საქმეში.
“მე ძალიან ბედნიერი ვარ, რომ ეს მოხდა. ჟურნალისტები თავს კარგად გრძნობენ. მათ პირველი კომენტარი უკვე გააკეთეს და როგორც ჩანს, ეს 24 საათიანი პატიმრობა მშვიდობიანად გადაიტანეს”, – აღნიშნა მაია ფანჯიკიძემ.
მინისტრმა მადლობა გადაუხადა ყველას, ვინც ჟურნალისტების გათავისუფლების საქმეში იყო ჩართული. განსაკუთრებული მადლობა მან საერთაშორისო თანამეგობრობას გადაუხადა, რომელიც ქართულ მხარეს დაეხმარა იმაში, რომ გადამღები ჯგუფის გათავისფლება დათქმულ დროს, ზუსტად 18:30 საათზე მომხდარიყო.
“ჩვენ ვიყავით მათთან მუდმივ სატელეფონო კონტაქტზე და, შესაბამისად, ჩვენმა მცდელობებმა შედეგი გამოიღო”, – განაცხადა მაია ფანჯიკიძემ.
საგარეო უწყების ხელმძღვანელი კიდევ ერთხელ გამოეხმაურა რუსეთის საგარეო საქმეთა სამინისტროს განცხადებას, რომელიც მათ ქართველ ჟურნალისტებთან დაკავშირებით გაავრცელეს.
“თქვენ იცით, რომ ჩვენ ამ განცხადებას უკვე ვუპასუხეთ ჩვენი განცხადებით, სადაც, აღვწერეთ ის, თუ რა მოხდა. შემდეგ მივუთითეთ იმაზე, რომ რუსეთის საგარეო საქმეთა სამინისტროს განცხადება არის აბსოლუტურად ალოგიკური, რადგანაც სწორედ რუსი მესაზღვრეების ქმედებების გამო მოხდა ეს პროვოკაცია და არა იმიტომ, რომ იგი ჩვენ გამოვიწვიეთ. ეს რა საკვირველია არანაირად არ იყო დაკავშირებული პრაღაში ბატონი აბაშიძისა და კარასინის შეხვედრასთან. ჩვენ შეშფოთებას გამოვთქვამთ იმის გამო, რომ რუსეთში ამ ფაქტს ასეთი ინტერპრეტაცია მიეცა. აქვე, ამ შემთხვევითაც მინდა ვისარგებლო და ყველას მოვუწოდო სიფრთხილისკენ. არის ძალიან დაძაბული ვითარება საერთოდ, ჩვენს რეგიონში და ჩვენ არ უნდა მივცეთ საბაბი არავის, რომ ასეთ საფრთხეში ჩაიგდონ თავი ჩვენმა ჟურნალისტებმა”, – აღნიშნა მაია ფანჯიკიძემ.
17.04.14
