მოძრაობა “სამართლიანი საქართველოსათვის” ლიდერი, სერგო ჯავახაძე და “სახალხო პარტიის” ლიდერი, მამუკა გიორგაძე გორის საოლქო საარჩევნო კომისიის გადაწყვეტილების გაუქმებას მოითხოვენ, რომლის მიხედვითაც ირაკლი ოქრუაშვილი გორის მერობის კანდიდატად დარეგისტრირდა.
როგორც ცესკო-ს პრესსპიკერმა ეკა აზარაშვილმა ჟურნალისტებს განუცხადა, მამუკა გიორგაძისა და სერგო ჯავახაძის მოთხოვნაზე ცენტრალური საარჩევნო კომისია დღეს სხდომაზე იმსჯელებს.
“გორის საოლქო საარჩევნო კომისიამ ირაკლი ოქრუაშვილი რეგისტრაციაში გაატარა როგორც გორის მერობის კანდიდატი. ცესკო-ში შემოსულია ორი საჩივარი ამასთან დაკავშირებით. მომჩივანი მხარეები ითხოვენ, რომ გაუქმდეს საოლქო საარჩევნო კომისიის გადაწყვეტილება, რადგანაც ისინი ამბობენ, რომ ირაკლი ოქრუაშვილს ბოლო ორი წლის განმავლობაში საქართველოში არ უცხოვრია. დღევანდელ სხდომაზე ცესკო ორივე საჩივარს განიხილავს, იმსჯელებს დეტალებთან დაკავშირებით და მიიღებს შესაბამის გადაწყვეტილებას”, – განუცხადა ცესკო-ს სპიკერმა, ეკა აზარაშვილმა ჟურნალისტებს.
კითხვაზე, უწერია თუ არა ირაკლი ოქრუაშვილს განაცხადში, რომ ის ბოლო ორი წელი საქართველოში ცხოვრობდა, ეკა აზარაშვილმა არ დააკონკრეტა და ჟურნალისტებს განუმარტა, რომ მათ შეუძლიათ აღნიშნული ინფორმაცია ცესკო-დან გამოითხოვონ.
22.04.14
