კულტურული მემკვიდრეობის დაცვის სააგენტოს ხელმძღვანელ ნიკოლოზ ანთიძის, კულტურის მინისტრ გურამ ოდიაშარიას და კომპანია RMG გოლდის კომერციული დირექტორის, სოსო ცაბაძის მტკიცებით, საყდრისი-ყაჩაღიანის ბორცვზე სამეცნიერო სამუშაოების ჩასატარებლად, მათ პროფესორი თომას შტოლნერი (ბოხუმის გერმანიის სამთო მუზეუმი / რურის უნივერსიტეტი) მოიწვიეს.
“გურია ნიუსი” გერმანიაში დაუკავშირდა შტოლნერს, რომელიც ამბობს, რომ საქართველოდან არანაირი მიწვევა არ მიუღია.
მოგესალმებით ბატონო შტოლნერ, საყდრისის მაღაროსთან დაკავშირებით გირეკავთ. საქართველოში აქტიურად საუბრობენ თქვენი მოწვევის შესახებ აღნიშნული ბორცვის ხელახალი გამოკვლევის მიზნით. მიიღეთ კულტურის სამინისტროსგან ან სხვა ნებისმიერი ორგანიზაცისგან მოწვევა?
გამარჯობათ. ამ წუთას საჭესთან ვარ, მაგრამ რადგანაც საყდრისის თემაზე რეკავთ უფლება არ მაქვს არ გიპასუხოთ. რაც შეეხება თქვენს შეკითხვას, ჩემი მოწვევის შესახებ, გეტყვით, რომ დღემდე არანაირი მოწვევა არ მიმიღია. თბილისიდან რამდენიმე მეგობარი დამიკავშირდა, რომლებმაც მითხრეს, რომ მოწვეული ვარ საერთაშორისო კომისიის წევრად, ასევე ვიცი, რომ მინისტრ ოდიშარიას უხსენებია ჩემი სახელი. გავეცანი პრესას და მხოლოდ აქედან ვიცი, რომ ჩემს მოწვევას აპირებენ. არანაირი ოფიციალური მოწვევა არ მიმიღია.
მოწვევის შემთხვევაში თუ დათანხმდებით ამ წინადადებას?
რა თქმა უნდა, თუ ასეთი წინადადება იქნება, დიდი სიამოვნებით დავთანხმდები. უფრო მეტიც, მონაწილეობას მივიღებ სამეცნიერო განხილვებში და თავად გავუწევ ორგანიზებას მსგავს აქტივობებს, მთავარია ამის სურვილი იყოს. მზად ვარ ჩვენი კვლევის პრეზენტაცია მოვუწყო ქართულ მხარეს და მათ მიერ დასმულ ნებისმიერ შეკითხვას ვუპასუხო. ბევრ მეცნიერს ვეკონტაქტე ამ თემასთან დაკავშირებით და ყველა ექსპერტი ამბობს, რომ იციან კომისიის შექმნის შესახებ, თუმცა გერმანული მხარის მიერ შემოთავაზებულ რომელ ხუთ მეცნიერზეა საუბარი, ეს არ ვიცით.
რა თქმა უნდა, ჩვენ ვითხოვეთ დამოუკიდებელი მეცნიერების ჩართვას, რომლებიც ობიექტურად და მეცნიერული თვალსაწიერიდან შეაფასებენ შედეგს. საქართველოზეა დამოკიდებული ოქროს არჩევს თუ კულტურულ მემკვიდრეობას, თუმცა საერთაშორისო მეცნიერები მოხარულები იქნებოდნენ, თუ ადგილზე ჩამოსვლის და კვლევის საშუალება მიეცემოდათ.
თომას შტოლნერის თქმით, ის დღესაც აქტიურად მუშაობს საყდრისის თემაზე და დარწმუნებულია, რომ საყდრისის გადასარჩენად დაწყებული სამოქალაქო აქტივობა, გამარჯვებით დასრულდება.
29.04.14
