საფრანგეთის პრეზიდენტმა ფრანსუა ოლანდმა საქართველოში ვიზიტის ფარგლებში პირველი შეხვედრა საგარეო საქმეთა მინისტრ მაია ფანჯიკიძესთან გამართა.
ფრანსუა ოლანდისა და მაია ფანჯიკიძის შეხვედრა თბილისის საერთაშორისო აეროპორტის ვიაიპი ნაწილში დაახლოებით 10 წუთის განმავლობაში მიმდინარეობდა. როგორც საფრანგეთის პრეზიდენტმა შეხვედრისას აღნიშნა, იგი საქართველოში ორი მიზნით ჩამოვიდა – ევროკავშირსა და საქართველოს შორის ასოცირების ხელშეკრულების გაფორმებისა და საქართველოს ტერიტორიული მთლიანობის მხარდასაჭერად.
“მინდა მხარდაჭერა გამოვხატო იმასთან დაკავშირებით, რომ ხელს აწერთ ასოცირების ხელშეკრულებს, რათა განვითარდებს ეკონომიკური ურთიერთობები. სწორედ ამიტომ ჩემი ვიზიტის პირველი ნაწილის ფარგლებში მე დავესწრები ქართველი და ფრანგი ბიზნესმენების ფორუმს”, – განაცხადა საფრანგეთის პრეზიდენტმა.
ამასთან, ფრანსუა ოლანდის განმარტებით, იგი მიესალმება საქართველოდან ცენტრალურ აფრიკაში სამხედრო კონტინგენტის გაგზავნის გადაწყვეტილებას.
“ჩემთვის ემოციურად მნიშვნელოვანი იყო იმის გაგება, რომ ცენტრალურ აფრიკაში კონტინგენტს აგზავნით. ეს კარგი დეტალია იმის წარმოსადგენად, თუ რისი გაკეთება ძალუძს საქართველოს ევროკავშირის ფარგლებში, ჯერ როგორც პარტნიორს და შორეულ პერსპექტივაში, როგორც წევრს – როცა დადგება ეს საკითხი, მაგრამ, რა თქმა უნდა, ჩვენ უნდა დავიცვათ ამ პროცესის თითოეული ეტაპი”, – აღნიშნა ფრანსუა ორლანდამა, რომელმაც ფანჯიკიძესთან შეხვედრაზე საქართველოს ტერიტორიული მთლიანობისთვის მხარდაჭერა კიდევ ერთხელ დაადასტურა.
თავის მხრივ, ფანჯიკიძემ საფრანგეთის პრეზიდენტს საქართველოს მხარდაჭერისთვის მადლობა გადაუხადა და აღნიშნა, რომ თბილისში მისი ვიზიტით მოხარულია.
13.05.14
