საქართველო ქალების და გოგონების სექსუალური ტრეფიკინგის, ასევე ქალების და მამაკაცების იძულებითი შრომის ტრანზიტს, წყაროს და მიმართულებას წარმოადგენს, – განაცხადა აშშ-ის სახელმწიფო მდივანმა აშშ-ის სახელმწიფო დეპარტამენტის მიერ მომზადებული ადამიანთა ტრეფიკინგის ყოველწლიური ანგარიშის წარდგენისას.
ჯონ კერის ინფორმაციით, ქალები ექცევიან სექსუალური ექსპლუატაციის ქვეშ ქვეყნის შიგნით და მის ფარგლებს გარეთ – თურქეთში, არაბეთის გაერთიანებულ საამიროებში, ეგვიპტეში, საბერძნეთში, რუსეთში, გერმანიასა და ავსტრიაში. ამას გარდა უზბეკი და სხვა ქვეყნების წარმომადგენელი ქალები ხდებიან იძულებითი პროსტიტუციის და კომერციული სექსუალური ექსპლუატაციის მსხვერპლი საქართველოს ტურისტულ მხარეში – ბათუმსა და გონიოში.
2013 წლის ადამიანთა ტრეფიკინგის ანგარიშში ასევე აღნიშნულია უცხო ქვეყნის მოქალაქეების გამოყენების შემთხვევები სოფლის მეურნეობის სექტორში, სამშენებლო თუ სხვა ტიპის ბიზნესებში.
„საქართველოს ხელისუფლება სრულად ვერ იცავს ადამიანთა ვაჭრობის აღკვეთის მინიმალურ სტანდარტებს, თუმცა მასთან შესაბამისობისთვის მნიშვნელოვან ძალისხმევას ეწევა. წინა წელთან შედარებით, ადამიანთა ვაჭრობის და ტრეფიკინგის მსხვერპლთა გამოსავლენად სამართალდამცავთა ძალისხმევა შემცირდა”, – ვკითხულობთ ანგარიშში.
აშშ მოუწოდებს საქართველოს, ეფექტური ღონისძიებები განახორციელოს ტრეფიკინგის აღმოსაჩენად და პოტენციური მსხვერპლის გამოსავლენად.
21.06.13
